Umufaransa Kylian Mbappe yamaze gufata umwanzuro ku hazaza he, akaba agiye gusinyira ikipe ya Real Madrid nk'uko amakuru ava muri Espagne abihamya.
Biravugwa ko ibiganiro hagati ya Real Madrid na Kylian Mbappe byongereye imbaraga muri iki cyumweru, nyuma y'uko iyi kipe yari imaze gusezerera PSG akinira mu mikino ya UEFA champions league.
Amasezerano ya Mbappe muri PSG ararangirana n'uyu mwaka w'imikino ndetse iyi kipe yagerageje kumwongerera andi, ariko umutima we wibereye i Santiago Bernabeu nk'uko bitangazwa n'ikinyamakuru Marca cyandikira muri Espagne.
Iki kinyamakuru kiravuga ko Kylian Mbappe azasinyira Real Madrid mu cyumweru gitaha, ariko bikazatangazwa ku mugaragaro mu mpeshyi ubwo amasezerano ye muri PSG azaba arangiye neza.
Kylian Mbappe yari yiteguye gutegereza kugeza mu mpeshyi byibuze akaba aribwo agira ikipe asinyira, ariko nyuma y'intsinzwi ya PSG yahise afata icyemezo cyo kuva muri iyi kipe bidasubirwaho.
Biravugwa ko Kylian Mbappe azahabwa amafaranga ari hagati ya miliyoni 50 na 67 z'amapawundi [recruitment] kugira ngo asinye, ndetse akazajya ahembwa miliyoni 20 z'amapawundi ku mwaka.
Real Madrid yagerageje gusinyisha Kylian Mbappe mu mpeshyi ishize, ariko PSG yanga kumurekura mu gihe bari bafite ikizere ko uyu musore yakongera amasezerano akaguma i Parc des princes.
Kylian Mbappe yagiye yanga ubusabe bwa PSG ndetse bivugwa ko hari amahirwe macye yari agihari ko yayigumamo igihe yabona iyi kipe irwanira ibikombe nka champions league, ariko yababajwe cyane n'ukuntu bakuwemo na Real Madrid.
Kylian Mbappe yafashe umwanzuro wo gusinyira Real Madrid(Net-photo)
