Guhera tariki ya 01 Ukwakira 2023, urugamba rwongeye kwambikana hagati ya M23 n'ingabo za Leta ya DR-Congo FARDC, aho buri ruhande rushinja urundi kurushotora kandi buri wese akemeza ko agomba kwirwanaho.
Umunsi ku munsi, imirwano ikaba igenda ifata indi ntera, kugera naho ejo ku 04 Ukwakira, M23 yavuze ko urugamba rwakomeye FARDC yitabaza ingabo zirinda umukuru w'igihugu. Kuri uwo munsi, izo ngabo zikaba zarahingukiye mu gace ka Masisi ndetse ngo ibitero bikorwa mu bice bya:Kizimba, Muhongozi, Kibarizo, Kirumbu ndetse n'ahandi nkuko byavuzwe na M23.
Mu gihe urugamba rwari Masisi ku munsi w'ejo, mu masaha y'igitondo cya none, Perezida wa M23 Bertrand Bisimwa yemeje ko ingabo za Leta zifatanyije n'indi mitwe irimo Wazalendo bafashe agace ka Kitshanga uyu mutwe wari warashyikirije ingabo za EAC ziri mu butumwa bw'amahoro.
M23 iremeza ko FARDC yageze mu gace ka Kitshanga
Ku ruhande rw'abashyigikiye DRC, baremeza ko Kitshanga yafashwe nyuma y'imirwano ihambaye yabahanganishije na M23 bikarangira bayirukanye. Ari nako bemeza ko bafashe n'ibindi bice byinshi byo muri Masisi mu mirwano yo kuri uyu wa Gatatu.
Mu gihe imirwano ikomeje hagati ya M23 na FARDC, guverinoma ya DR-Congo yanze kugirana amasezerano y'amahoro n'uyu mutwe, ahubwo bakavuga ko bazabatsinda mu buryo bwa gisirikare. Ni mu gihe M23 nayo ihamya ko itazamanika amaboko hatabayeho ubwumvikane.
