Ingabo za Repubulika Iharanira Demokarasi Congo FARDC zaramukiye mu mirwano n'umutwe w'inyeshyamba wa M23 kuri uyu wa Gatandatu muri Teritwari ya Masisi mu gace ka Kilorirwe, aho aka gace uyu mutwe wari umaze ibyumweru birenga bibiri ukigaruriye.
Major Willy Ngoma umuvugizi wa M23 mu bya gisirikare, akaba yatangaje ko ingabo za FARDC n'abafatanyabikorwa babo barimo: Wazalendo, ingabo z'Uburundi, FDLR ndetse n'abandi, ko babyutse basuka ibibombe ku birindiro byabo aho muri Kilorirwe.
Uretse kandi Willy Ngoma wemeje aya makuru, Lawrence Kanyuka nawe uvugira M23 mu bya politike, na we akaba yahamije ko FARDC yagabye igitero muri Kilorirwe bakoresheje imbunda nini. Willy Ngoma, akaba yakomeje atangaza ko birwanyeho bagashushubikana FARDC.
Imirwano yongeye kwaduka aha muri Kilorirwe, nyuma yuko ku wa Mbere w'iki Cyumweru, M23 yari yigaruriye agace ka Rugarama muri Teritwari ya Rutshuru, ndetse n'ibindi bice biherereye hafi y'ako gace, mu mirwano ikarishye yahabereye.
