Kuri iki Cyumweru tariki ya 25 Gashyantare 2024, umutwe witwaje wa M23 ukorera mu burasirazuba bwa Repubulika Iharanira Demokarasi ya Congo aho uhanganye n'Ingabo za Leta y'iki gihugu FARDC, uri kwigamba intsinzi ikomeye.
Ni intsinzi M23 ivuga ko yegukanye mu duce tune ari two: Minova, Nyenyeri, Kwa Madimba, ndetse na Mushaki twose duherereye muri Teritwari ya Masisi mu Ntara ya Kivu n'Amajyaruguru.
Lt Col Willy Ngoma umuvugizi wa M23 mu byasirikare, niwe wigambye iby'iyo ntsinzi, yemeza ko impamvu barwana igamije icyiza bityo ko badatewe ubwoba na nyirantarengwa bahabwa n'uwo ari we wese. Ahamya ko bambuye ingabo za Leta n'abo bahanganye intwaro n'amasasu byinshi.
Mu magambo ya Lt Col Willy Ngoma yacishije kuri X ati "Mugende mubwire abo bose bahuha nyirantarengwa ko turi hano kubera impamvu nziza. Nta mbaraga z'intwaro zatuma duhindura uko dutekereza. Umusirikare arapfa ntamanika amaboko. Turi ku butaka bw'abakurambere bacu."
M23 yigambye iyi ntsinzi, mu gihe kuri uyu wa Gatandatu barimo bamagana ingabo za FARDC bashinjaga kugaba ibitero ku mugi wa Sake no kwibasira basivile batuye muri ako gace no mu nkengero zaho.
