Kylian Mbappé akomeje kwandika amateka akomeye muri Real Madrid, nyuma yo kugera ku gahigo ka Cristiano Ronaldo ko gutsinda ibitego byinshi mu mwaka umwe w'imikino nk’umukinnyi w’iyi kipe y’i Madrid.
Uyu rutahizamu w’Umufaransa yatsinze igitego cya 59 mu mwaka wa 2025, anganya agera kubyo Cristiano Ronaldo yagezeho mu 2013.
Mbappé yageze kuri iyi ntera ikomeye ku munsi we w’amavuko, atsinda penaliti mu mukino Real Madrid yatsinzemo Sevilla wabereye kuri Santiago Bernabéu, mu ijoro ryakeye.
Mu rutonde rw’abakinnyi batsinze ibitego byinshi mu mwaka umwe w'imikino muri Real Madrid, Cristiano Ronaldo arayoboye aho mu 2013 yatsinze ibitego 59 mu mikino 50, akurikirwa na Mbappé watsinze ibitego 59 mu mikino 59 mu 2025.
Ronaldo kandi yanditse amateka mu 2012 atsinda ibitego 58 mu mikino 71, no mu 2014 atsinda ibitego 56 mu mikino 60.
N’ubwo Mbappé yanganyije na Ronaldo ku mubare w’ibitego, umunya-Portugal yabigezeho mu mikino mike, ibintu bikomeza kugaragaza ubudasa bw’aba bakinnyi bombi.
Iyo hiyongereyeho ibitego Mbappé yatsinze mu ikipe y’igihugu y’u Bufaransa, yarangije umwaka wa 2025 afite ibitego 66 ku rwego rwa club n’igihugu.
Ku rundi ruhande, umwaka mwiza wa Cristiano Ronaldo mu mibare y’ibitego muri club n’igihugu wabaye uwa 2013, aho yatsinze ibitego 69.
Ibi Mbappé agezeho bibaye mu mwaka we wa mbere wuzuye akinira Real Madrid, nyuma yo kuyijyamo mu mpeshyi ya 2024.
Abasesenguzi b’umupira w’amaguru bakomeje kugaragaza ko uyu mukinnyi afite amahirwe menshi yo gukuraho utu duhigo twa Cristiano Ronaldo mu myaka iri imbere, bitewe n’ubushobozi n’umuvuduko agaragaza muri shampiyona ya Espagne n’amarushanwa mpuzamahanga.
Kylian Mbappé yateye ikirenge mu cya Cristiano Ronaldo
