Ikipe ya Paris Saint-Germain ikinamo nyiri Ballon d'or zirindwi ariwe Lionel Messi, yamaze gutangaza ko uyu mukinnyi wayo yamaze gusangwamo Covid-19.
Ibi bije nyuma y'iminsi mike Lionel Messi agaragaye ari kuririmba ndetse anabyina mu birori byaberaga muri Argentine ubwo yari kumwe n'umufasha we Antonela Roccuzzo.
Mu gihe amashampiyona atandukanye yafashe uturuhuko, Lionel Messi n'umugore we nabo berekeje mu biruhuko iwabo muri Argentine ubundi barya ubuzima koko.
Amashusho yagaragajwe ku rubuga rwa Instagram yagaragaje Lionel Messi na Antonela Roccuzzo barya ubuzima mu gitaramo aho bari Sante fe muri Rosario.
Ubu ikipe ye ya PSG yamaze kwemeza ko Lionel Messi yanduye Covid-19 ndetse akaba yahise ashyirwa mu kato. Hari abandi bakinnyi batatu bakinana na Messi muri PSG nabo banduye aribo Juan Bernat, Sergio Rico na Nathan Bitumazala.
Lionel Messi aheruka gukinira PSG tariki 22 Ukuboza 2021 ubwo banganyaga na Lorient igitego 1-1 bagahita bajya mu biruhuko by'iminsi mikuru.
Umukino ukurikira kuri PSG bazakina n'ikipe ya Vannes mu gikombe cy'igihugu kuri uyu wa mbere, mbere y'uko bajya gusura Lyon muri shampiyona tariki 9 Mutarama 2022.
Kuva ku wa mbere leta y'Ubufaransa izashyiraho amabwiriza mashya agenga ibijyanye no kujya mu kato aho abantu banduye Covid-19 ariko bikingije bazajya bajya mu kato k'iminsi irindwi aho kuba icumi nk'uko bisanzwe.
Lionel Messi yanduye Covid-19(Image:Daily mail)
Lionel Messi na Antonela Roccuzzo mu birori i Rosario(Net-photo)
