Inkuru dukesha ikinyamakuru SPORT cyandikira muri Espagne iravuga ko ikipe ya FC Barcelona yifuza cyane umunya-Espagne Sergio Reguilon ngo imusimbuze Jordi Alba bigaragara ko ari kugana mu za bukuru.
FC Barcelona ivuzwe kuri Sergio Reguilon nyuma y'uko yagiye ivugwaho gushaka umukinnyi ukina inyuma ku ruhande rw'ibumoso kuva mu mpeshyi ishize. Iyi kipe yavuzwe kuri Jose Gaya wa Valencia, ndetse na Alejandro Grimaldo wa Benfica.
Ku rundi ruhande mu minsi ishize ikipe ya Tottenham byavuzwe ko yifuza Menphis Depay na Clement Lenglet bose bakinira FC Barcelona, ibi bikaba ari nabyo byafasha iyi kipe y'i Barcelona kubona umukinnyi ishaka.
Kuba Sergio Reguilon yajya muri FC Barcelona ntiyaba ari inkuru nziza i Madrid bitewe n'ahashize he mu ikipe ya Real Madrid. Uyu musore w'imyaka 25 yageze mu bato ba Real Madrid mu 2005, ndetse akina umukino wa mbere mu ikipe ya mbere mu 2015.
Real Madrid yatije Sergio Reguilon inshuro ebyiri muri Logrones, ndetse yongera gutizwa mu ikipe ya FC Sevilla mbere y'uko yerekeza muri Tottenham Hotspurs mu 2020.
Mu mikino 22 ya Premier league Reguilon amaze gukina muri uyu mwaka w'imikino, yatsinzemo ibitego bibiri ndetse anatanga imipira itatu yavuyemo ibitego. Kuva yagera muri Tottenham yakinnye imikino 64, atsinda ibitego bine anatanga imipira 22 yavuyemo ibitego.
FC Barcelona yifuza Sergio Reguilon(Image:Getty)
Barça irifuza gutanga Depay ngo ibone Reguilon(Image:beIN sport)
