Amakuru aheruka
Kuri uyu wa kane taliki 24 Werurwe 2022 ukwezi kurashize Putin agabye ibitero kuri Ukraine. Mu butumwa bwa videwo, Perezida wa Ukraine, Volodymyr Zelenskyy arasaba ko Isi yose yakoranye imyigaragambyo isaba ko ibitero by’Uburusiya byahagara.
Minisiteri y’ingabo y’Ubwongereza ivuga ko ingabo za Ukraine zirimo kugaba ibitero ku birindiro by’Uburusiya mu nkengero za Kyiv ndetse ko ingabo za Ukraine zikomeje kwatsa umuriro ku barwanyi ba Putin kandi ngo bishoboka ko baba batangiye gucika intege.
Umuyobozi wa Kyiv (Meya), Vitali Klitschko, yatangarije abanyamakuru ko abasivili 264 bo muri uyu mujyi baguye mu bitero by’Uburusiya, nyamara Uburusiya burahakana ayo makuru yo kwibasira abasivili mu ntambara.
Uburusiya buravuga ko ingabo zabwo zarashe igisasu kirekire cyo mu nyanja kugira ngo zigere ku bubiko bw'intwaro za Ukraine hanze y'umujyi wa Rivne uherereye mu majyaruguru y'uburengerazuba hamwe na misile ebyiri za Tochka-U mu karere k’inganda mu nkengero za Kyiv.
Politiki
Perezida wa Amerika, Joe Biden yageze i Buruseli kugira ngo yitabire inama y’umuryango wo gutabarana wa NATO, ndetse n’itsinda ry’ibihugu 7 (G7) n’ubumwe bw’ibihugu by’Uburayi (EU) iteganyijwe uyu munsi.
Uyu munsi biteganyijwe ko Zelenskyy aza kugeza ijambo ku bayobozi ba NATO.
Umuyobozi wa NATO, Jens Stoltenberg, yavuze ko abanyamuryango ba NATO bazemera kohereza “imitwe ine” mu burasirazuba bwa Bulugariya, Hongiriya, Romania na Slovakiya kugirango bafashe Ukraine guhangana na Putin.
- Impunzi zikomeje kwiyongera
Loni ivuga ko abanya Ukraine barenga miliyoni 3,5 bahunze igihugu nyuma y’ibitero by’Uburusiya naho miliyoni zirenga 10 zavanywe mu byabo.
- Ibihano bigiye kwiyongera
Umwe mu bayobozi bakuru bo muri Leta zunze ubumwe za Amerika yavuze ko ibihano bishya bigiye gufatirwa Uburusiya by’umwihariko “abanyapolitiki” n’abandi bakize ku Isi cyane cyane ibyegera bya hafi bya Perezida Vladimir Putin.
Putin nawe akomeje kuvuga ko gaz yavaga mu Burusiya ijya mu bihugu by’Uburayi igomba guhagarara akajya ayiha ibihugu bitari inshuti n’ibihugu bya NATO.
Amakompanyi akomeye akomeje gukomanyiriza Uburusiya
Igihangange mu gukora imodoka, kompanyi ya Renault yatangaje ko igiye guhita ihagarika imirimo ku ruganda rwayo rwa Moscou nyuma yuko Ukraine isabye ko iyi sosiyete yamagana ibitero by’u Burusiya. Isosiyete yatangaje ko Renault irimo gutekereza ku buryo bushoboka ko ishami ryayo ry’Uburusiya rya AvtoVAZ ryaba rifunze mu gihe cyose haba hakomeje intambara.
