Kuri uyu wa Kane amakuru agezweho mu mirwano ishyamiranyije ingabo za Repubulika Iharanira Demokarasi ya Congo FARDC n'abandi bafatanya kurwanya umutwe wa M23 barimo Ingabo za SADC, iz'u Burundi n'indi mitwe, aravuga ko M23 ikomeje gufata ibice bigari muri Teritwari ya Rutshuru muri Kivu y'Amajyaruguru.
Mu masaha 48 yashize, biremezwa ko uyu mutwe wa M23 wabashije gufata ibice bitandukanye birimo: Nyanzale, Kirima, Kashalira, Kikuku, na Kibingu. Maj Gen Chico Tshitambwe ukuriye ibikorwa bya gisirikare muri Rutshuru, yemereye ibiro ntaramakuru Reuters ko Nyanzale yafashwe na M23.
Ni mu gihe kuri uyu 07 Werurwe 2024, amakuru ari kuvuga ko ibitero bya M23 bikomeje kwibasira Gurupoma ya Mutunda na Kibirizi biherereye muri Teritwari ya Rutshuru.
Mu mirwano yasakiranyije impande zombi mu masaha yo muri iki gitondo, biravugwa ko FARDC n'abafatanyabikorwa bayo, bahungiye mu gace ka Rwindi ari naho imirwano ikomereje kuri ubu. Andi makuru aremeza ko M23 mu minsi ibiri ishize, yafashe agace ka Kikuku ka kaba umurwa Mukuru wa Bwito ho muri Rutshuru.
Kugera magingo aya, impande zombi zikomeje imirwano, mu gihe Umuryango wa Afurika Yunze Ubumwe uheruka kwemeza ko ushyigikiye kuba ingabo za SADC ziri gufasha FARDC kurwanya M23, ibyo u Rwanda rwavuze ko rutishimiye, kuko Leta ya Congo ikorana na FDLR umutwe w'iterabwoba urimo nabakoze Jenoside mu Rwanda mu 1994.
