Ibintu bikomeje kudogera mu burasirazuba bwa Repubulika Iharanira Demokarasi Congo mu ntambara iri guhuza ingabo z'iki gihugu FARDC ndetse n'umutwe witwaje intwaro wa M23, aho imirwano imaze ukwezi kurenga yongeye kubura, impande zose zikaba zititeguye gutakaza.
Mu minsi yashize, imirwano yarimo kubera mu bice bitandukanye bya Teritwari ya Masisi, ariko kuri ubu, amakuru aravuga none ku wa 11 Ugushyingo 2023, ingabo za DR-Congo zabyukirije imvura y'amabombe ku mutwe wa M23 muri Teritwari ya Nyiragongo.
FARDC yongeye gukoresha Sukhoi-25 irasa umutwe wa M23
Ubuyobozi bukuru bwa M23 buramutse butangaza ko FARDC yabyutse ibarasa kuri uyu wa Gatandatu hakoreshejwe indege za Sukhoi-25 ndetse n'imbunda nini. M23 iravuga ko ibi bitero biri kubera mu bice bya Kibumba na Buhumba biherereye mu bilometero 20 uvuye i Goma.
Guhera tariki ya 01 Ukwakira 2023, imirwano yongeye kwaduka hagati y'impande zombi aho imirwano yaberaga muri Teritwari ya Masisi na Nyiragongo. Iyi mirwano ikaba yaradutse nyuma y'amezi atandatu ihagaze. Magingo aya, M23 ivuga ko irwana irengera abaturage.
