Guhera tariki ya 01 Ukwakira 2023, urugamba rwongeye kuba akasamutwe mu burasirazuba bwa Repubulika Iharanira Demokarasi ya Congo hagati y'ingabo z'iki gihugu FARDC ndetse n'umutwe w'inyeshyamba wa M23.
Amakuru aturuka ku mirongo y'imbere ku rugamba, aravuga ko M23 ikomeje guhabwa isomo rya gisirikare, ndetse ngo magingo aya agace ka Kitshanga karangije kugwa mu maboko y'ingabo za Leta nkuko uyu mutwe ejo wabyiyemereye.
M23 imerewe nabi ku mirongo y'urugamba na FARDC
Mu gitondo cyo kuri uyu wa Gatanu, umuvugizi wa M23 mu bya Politike Lawrence Kanyuka, yemeje ko FARDC ibyutse ibacanaho umuriro umugurumana hakoreshejwe ibibunda bya rutura, ariko akaba yahamije ko bari kwirwanaho kinyamwuga bitandukanye nuko abantu bari kubivuga ku mbuga nkoranyambaga.
Magingo aya, imirwano ikaba irimbanyije muri Teritwari ya Rutshuru muri shoferi ya Bwito mu bice bya Tongo, Rushovu ndetse na Rushege. Ni mu gihe hari amakuru avuga ko muri Teritwari ya Masisi, ibice M23 yari ifite nabyo yabyambuwe.
Umuvugizi wa M23 mu bya politike Lawrence Kanyuka aratunga intoki ingabo z'Uburundi
Ku rundi ruhande kandi, uyu muvugizi wa M23 Lawrence Kanyuka, mu itangazo yashyize ku rubuga X, yashinje ingabo z'Uburundi gufatanya na FARDC kubagabaho ibitero bambaye impuzankaho ya FARDC.
Izi ngabo z'Uburundi, zikaba ziri muri DR-Congo mu butumwa bw'amahoro bw'ingabo zo mu muryango w'Afurika y'Iburasirazuba EAC. Nubwo M23 iri gushinja ingabo z'Uburundi gufatanya n'iza Congo, ariko kandi impande zose bireba ntacyo zirabivugaho.
