Kuri uyu wa mbere tariki ya 20 Werurwe 2023, muri Kenya haramukiye imyigaragambyo karahabutaka yo kwamagana ubutegetsi bwa Perezida William Ruto.
Abanya-Kenya bari gushinja ubutegetsi izamuka ry'ibiciro ku masoko biri gutuma ubuzima buhenda. Bakaba kandi bashinja ubutegetsi bwa Ruto ko harimo ruswa.
Ku by'ibyo, iyi myigaragambyo ikaba yari yateguwe n'Umunyapolitiki Raila Odinga ukuriye ihuriro Azimio la Umoja ritavuga rumwe n’ubutegetsi bwa Perezida William Ruto.
Akaba yari yahamagariye abamushyigikiye kwigabiza imihanda kuri uyu 20 Werurwe.
Imyigaragambyo muri Kenya ku wa 20 Werurwe 2023
Iyi myigaragambyo ikaba yabereye mu bice bitandukanye bya Kenya uhereye mu murwa mukuru Nairobi, ukagera ku migi y'Intara.
Mu ntara ya Kisumu ubwo Polisi yageragezaga gusubiza inyuma abigaragambya, byabaye ngombwa ko bayisumbya imbaraga birukankana abapolisi, bituma nabo bafumyamo.
Amashusho yakomeje gukwirakwira ku mbuga nkoranyambaga agaragaza Abapolisi muri iyi ntara ya Kisumu bakizwa n'amaguru.
Ninako kandi andi mashusho yagiye hanze yerekana inzego zirimo Polisi, zitatanya abigaragambya zifashishije ibyuka biryana mu maso ndetse zinabacucira amazi, ariko abandi na bo bazitera amabuye.
Ikinyamakuru The Star cyo muri iki gihugu kiba cyatangaje ko Abayobozi ba Azimio la Umoja batawe muri yombi ubwo imyigaragambyo yatangiraga, gusa baza kurekurwa irangiye.
Ikindi kandi, mu bari batawe muri yombi harimo Senateri Kilifi Stewart Madzayo.
Magingo ntiharamenyekana niba hari abaguye muri iyi myigaragambyo.
Inzego z'umutekano muri Kenya zatatanyije abigaragambyaga zikoresheje ibyuka biryana mu maso
