Kenya: Abantu 238 bongeye gushotora Polisi barafungwa

Kenya: Abantu 238 bongeye gushotora Polisi barafungwa

 Mar 28, 2023 - 08:56

Polisi yo muri Kenya yafunze abantu 238 bagerageje kongera kuyirwanya mu myigaragambyo iri kuhabera. Raila Odinga akomeje guterana amagambo na Polisi kumugaragaro

Tariki ya 20 Werurwe 2023, nibwo Raila Odinga umuyobozi w'ishyaka Azimio la Umoja ritavuga rumwe n'ubutegetsi bwa Kenya yari yateguye imyigaragambyo ku nshuro ya mbere.

Odinga ubwo yateguraga iyi myigaragambyo, akaba yarahamagariye Abanya-Kenya kwamagana ubutegetsi bwa Perezida William Ruto ashinja gutuma ubuzima buhenda mu gihugu. 

Mu cyumweru cyashize nibwo hakwirakwijwe amashusho ku mbuga nkoranyambaga yerekana bamwe mu bigaragambya, birukankana Polisi nayo igakizwa n'amaguru.

Ku bw'ibyo, kuri uyu wa mbere nanone tariki ya 27 Werurwe, abigaragambyaga basaga 238 bagiye kwigaragambiriza ku biro bya Polisi bahita bajyanwa mu gihome.

Ibigaragambyaga muri Kenya batawe muri yombi 

Umuyobozi wa Polisi muri Kenya Inspector-General Japhet Koome akaba yaravuze ko aba bafunzwe bigaragambije mu buryo butemewe n'amategeko.

Nina ko kandi ikinyamakuru BBC kiri gutangaza ko umusore umwe yaguye mu myigaragambyo yejo ku wa mbere.

Uyu akaba ari umuntu wa kabiri uguye muri iyi myigaragambyo nk'uko bitangazwa.

Raila Odinga akomeje guhangana na Polisi

Umuyobozi wa Polisi Inspector-General Japhet Koome, yatangaje ko imyigaragambyo iri gukorwa n'abambari ba Raila Odinga itemewe n'amategeko ndetse ahita abasaba ko bihagarikwa.

Nyamara Polisi igitangaza ibi, Raila Odinga nawe yahise atangaza ko bazakomeza imyigaragambyo kandi ikazajya iba kabiri mu cyumweru kugeza ibyo basaba byemewe. Ati " Niba mubishaka ni mupfunge ndahari."

Umuyobozi wa Polisi Inspector-General Japhet Koome na Raila Odinga 

Guverinoma ya Kenya nayo ikaba itangaza ko yahagurukiye iyi myigaragambyo yandutse mu gihugu.

Ni mu gihe kandi bamwe mu bayobozi b'ishaka rya Azimio la Umoja batangaza ko imyigaragambyo atari iy'abayoboke baryo gusa, ko ahubwo ari iy'Abanya-Kenya Bose. Bati " Izi ni impinduramatwara."

Muri rusange hari kwibazwa niba Raila Odinga arahagarika abambari be bakarekera imyigaragambyo cyangwa se Guverinoma iraza kwemera bakicara bakaganira.