Intambara ya Israel n'umutwe wa Hamas wo muri Palestine irakomeje aho iminsi ibaye 28 barwana. Ku wa 07 Ukwakira 2023, nibwo Hamas yagabye ibitero bikomeye kuri Israel aho abantu 14000 bishwe naho abandi 240 bafatwa bugwate.
Guhera icyo gihe, Israel yatangije ibitero bikomeye by'indege muri Gaza, kugera aho banohereje abasirikare barwanira ku butaka muri Gaza guhiga abarwanyi ba Hamas bafite ibirindiro bikomeye munsi y'ubutaka.
Magingo aya Israel ikomeje kurasa ahantu hose icyeka ko haba hari abarwanyi ba Hamas, nko mu mashuri, mu nsengero, ku bitaro n'ahandi. Kuri uyu wa 03 Ugushyingo, Israel yarashe imbangukiragutabara ku bitaro bya 'Al-Shifa hospital' aho bemeje ko Hamas yarimo gutwaramo intwaro.
Israel yarashe imbangukiragutabara ku bitaro bya Al-Shifa Hospital
Abashinzwe ubutabazi muri Gaza bakaba bavuze ko iyi mbangukiragutabara yari itwaye inkomere ku mupaka wa Rafah uhuza Gaza na Misiri.
Ku rundi ruhande, umuyobozi wa Hezbollah Hassan Nasrallah ku munsi w'ejo yatangaje ko yishimiye igitero Hamas yakoze, ndetse asaba ko ibihugu by'Abarabu byashyigikira Hamas.
Kuri Hassan, avuga ko abanya-Israel 14000 n'abandi 240 bashimuswe byakozwe mu buryo bwo kwirwanaho. Magingo aya abanya-Palestine barenga 9,000 bamaze kwitaba Imana, mu gihe abasirikare barenga 300 ba Israel nabo bamaze gupfa.
Ukraine n'u Burusiya bakomeje kurasana
Iminsi 619 irashize Ukraine n'u Burusiya barwana ubudatuza. Guverineri wa Kherson Vladimir Saldo aratangaza ko Ukraine yakoze igitero muri uwo mugi abantu 9 baricwa. Ku rundi ruhande u Burusiya bwahise bwihimura bukora ibitero mu bice 24 bya Ukraine.
Ukraine n'u Burusiya iminsi 619 irashize barwana
Biratangazwa ko muri Kharkiv u Burusiya bwaharoshye dorone 38 zibasira ibikorwaremeza. Ukraine yavuze ko muri izo dorone, 24 zashyizwe hasi.
Ku rundi ruhande, Ukraine iravuga ko u Burusiya buri gutegura igitero gikomeye kuri Kyiv. Magingo aya, Ukraine yanze ibiganiro by'amahoro ivuga ko intambara izarangirira ku mirongo y'urugamba.