Kuri uyu wa Gatanu tariki ya 05 Mata 2024, nibwo Perezida wa Repubulika ya Czech Petr Pavel na Andry Rajoelina wa Madagascar bageze mu Rwanda mu masaha ya saa 21h z'i Kigali.
Aba bakuru b'Ibihugu byombi bakigera ku Kibuga Mpuzamahanga cy'indege cya Kigali i Kanombe, bakiriwe na Minisitiri w'Ububanyi n'Amahanga Dr.Vincent Biruta.
Perezida wa Madagascar, akaba yari kumwe n'umugore we Madamu Mialy Rajoelina. Baje kwifatanya n'Abanyarwanda mu muhango wo gutangiza icyumweru cy'icyunamo n'iminsi 100 yo kwibuka ku nshuro ya 30 Jenoside yakorewe Abatutsi. Uwo muhango utegerejwe kuri uyu wa 07 Mata 2024.
Kuri uyu mugoroba kandi mu bandi banyacyibahiro baraye i Kigali, bitabiriye uyu muhango wo kwibuka ku nshuro ya 30, barimo Madamu Lauriane Doumbouya, umugore wa Perezida wa Guinée-Conakary Lt Gen Mamadi Doumbuya.
Perezida wa Czech Pavel, ni inshuro ya mbere ageze mu Rwanda, aho agiye kuhamara iminsi itatu mu ruzinduko rw'akazi, bikaba byitezwe ko azagirana ibiganiro na Perezida Kagame, ndetse bakazagirana ikiganiro n'itangazamakuru.
Perezida wa Czech Petr Pavel yageze mu Rwanda ku nshuro ya mbere
Perezida wa Madagascar Rajoelina na Madamu we Mialy Rajoelina baraye i Kigali
Madamu Lauriane Doumbuya umugore wa Perezida wa Guinea Lt Gen Mamadi Doumbuya yaraye i Kigali
