Mu burasirazuba bwa Repubulila Iharanira Demokarasi ya Congo imirwano irakomeje hagati y'umutwe wa M23 n'ingabo z'iki gihugu FARDC zifashijwe n'abacanshuro ndetse n'indi mitwe yitwaje intwaro irimo FDLR, Nyatura, Wazalendo ndetse n'iyindi.
Magingo aya ku mirongo y'imbere ku rugamba, hari hashize iminsi impande zombi zihererekanya ibisasu biremereye, gusa kuri ubu, amakuru aturuka aho muri DR-Congo, aravuga ko FARDC yazanye ku rugamba indege za Sukhoi-25 kugira ngo basenye ibirindiro bya M23.
Ubuyobozi bwa M23 buratangaza ko FARDC iri kubasukaho ibisasu by'indege mu bice bya Kibumba na Buhumba biherereye muri Teritwari ya Nyiragongo ndetse no mu bindi bice biri hafi aho.
M23 ikaba ivuga ko ibitero biri kuyigabwaho biri guturuka ku musozi wa Kanyamahoro, mu gihe banemeza ko bakomeje kwirwanaho barengera n'abaturage, banavuga ko ibitero bya FARDC biri gukorwa buhumyi.
Ku rundi ruhande, hari amakuru avuga ko abarwanyi ba Wazalendo bari guhonyorwa n'inzara, ndetse bakaba bari gushinja guverinoma kubatererana ikabima ibyo kurya ndetse ntibabahe n'intwaro zihagije.
Ni mu gihe aba barwanyi bafashe umwanzuro wo guhunga urugamba barimo na M23, ariko ngo abasirikare ba Leta babasaba kugaruka bakareba uko bahabwa ibyo bakeneye.
