Ku mugoroba wo kuri uyu wa gatatu abakunzi b'umupira w'amaguru by'umwihariko uw'i Burayi, amaso yabo yari yerekeje i Stamford Bridge mu Bwongereza no kuri Estadio de la Ceramica muri Espagne.
Ni imikino ya 1/4 ya UEFA Champions league yari yakomeje ahabaye imikino ibiri kuko indi ibiri yabaye ku wa kabiri. Mu Bwongereza ikipe ya Chelsea yari yakiriye Real Madrid, aho abenshi bari bategereje kureba ko Real Madrid yihorera kuko ubwo baheruka guhura na Chelsea yayitsinze ikanayikuramo.
Ibitego bitatu bya Karim Benzema yatsinze ku munota wa 21 ku mupira yahawe na Viniscius Junior, ku munota wa 24 ku mupira wa Luka Modric n'umunota waa 46 nibyo byatumye Real Madrid icyura intsinzi, mu gihe Chelsea yabonye igitego cy'impozamarira cyatsinzwe na Kai Havertz ku munota wa 40 nyuma y'umupira yari ahawe na Jorginho.
Real Madrid yatsindiye Chelsea mu Bwongereza(Image:Marca)
Real Madrid yateye intambwe ya mbere igana mu mikino ya 1/2, mu gihe umukino wo kwishyura uzaba tariki 12 Mata 2022 ukabera ku kibuga cya Real Madrid aricyo Santiago Bernabeu.
Ku rundi ruhande muri Espagne ku kibuga cya Villarreal aricyo Estadio de la ceramica, ikipe ya Bayern Munich yatunguwe ikurayo ibitari byitezwe na benshi kuri uyu mukino.
Ni umukino Villarreal ya Unai Emery itahabwaga amahirwe menshi dore ko yakinaga na Bayern Munich imwe mu makipe anahabwa amahirwe yo kuba ashobora gutwara iki gikombe, mu gihe Villarreal yo ifatwa nk'imwe mu makipe adahambaye asigayemo.
Igitego kimwe cya Villarreal cyabonetse ku munota wa munani cyatsinzwe na Arnaut Danjuma ku mupira yahawe na Daniel Parejo, nicyo cyasoje umukino n'ubwo Bayern Munich yakomeje kwataka ariko ikabura igitego.
Arnaut Danjuma yatsindiye Villarreal igitego(Net-photo)
Umukino wo kwishyura ni tariki 12 Mata 2022 ku kibuga Arianza Arena cya Bayern Munich, ubundi abahungu ba Julian Negelsmann bakareba ko bakwishyura cyangwa bagasezererwa.
