Kuri iki Cyumweru imirwano yongeye gukomeza mu burasirazuba bwa Repubulika Iharanira Demokarasi ya Congo hagati y'ingabo z'iki gihugu FARDC ndetse n'umutwe witwaje intwaro wa M23 mu bice bya Mushebere na Bumbasha muri Gurupoma ya Bukombo.
Imirwano ya none, ikaba yatangiye mu ruturuturu ku muhanda wa Muremure- Karuba, aho byemezwa ko imirwano ikijya imbere magingo aya. Amakuru yo kongera gutana mu mitwe, akaba yemejewe n'umuvugizi wa M23 Laurence Kanyuka.
M23 na FARDC bakomeje gutana mu mitwe
Uyu muyobozi mu butumwa bwo kuri X, akaba yahamije ko ahagana saa cyenda zo murukerera, ari bwo ingabo za Leta FARDC, ziri kumwe n'indi mitwe bafatanya irimo Wazalendo, Abacanshuro, Ingabo z'Abarundi n'abandi, babagabyeho ibitero bikomeye.
Akaba yunzemo ko bakoresheje indege, ibifaru, dorone, ndetse n'imbunda nini bagaba ibitero ku birindiro byabo mu bice bya Mushaki, Kilorirwe na Kitshanga, ndetse ko ibyo bitero byakorewe ahantu hatuye abasivure. Kanyuka, akaba avuga ko M23 ifite uburenganzira bwo kwirwanaho.
Impande zombi zikaba zongeye kurwana kuri iki Cyumweru, nyuma yuko kuri uyu wa Gatandatu nabwo bongeye kurwana. Aba bari kurwana, mu gihe hariho agahenge k'amahoro kagizwemo uruhare na USA, impande zombi zikaba zikomeje kwitana bamwana.
