Nyuma yuko intambara hagati ya Israel n'umutwe wa Hamas wo muri Palestine yongeye gusubukura, Israel yongeye gukaza umurego irasa ku bikorwamezo bya gisivire ivuga ko ari ho aba barwanyi bashinze ibirindiro byabo.
Ubuyobozi muri Gaza bwatangarije Al Jazeera ko abantu 700 bamaze gupfa mu masaha 24, mu gihe Hamas itangaza ko idashobora kongera kurekura imfungwa mu gihe Israel yakomeza kurasa abaturage.
Imirwano yongeye kubura hagati y'impande zombi, mu gihe hari hashize iminsi baremeranyije guhagarika imirwano no kurekura imfungwa.
Guhera tariki ya 07 Ukwakira imirwano yatangira, abantu 15,500 bamaza gupfa muri Palestine, mu gihe Israel ivuga ko yapfushije abantu 1,200.
Ukraine yongeye gushinja u Burusiya ibyaha by'intambara
Ubuyobozi muri Ukraine bwatangiye iperereza nyuma y'amashusho yagaragaje abasirikare babo babiri bamanitse amaboko ari ko bakaraswa n'Abarusiya. Ibi bikaba byarabaye ku wa 02 Ukuboza 2023 mu gace ka Stepove mu Ntara ya Donetsk.
Ubushinjacyaha muri Ukraine, bukaba butangaza ko kurasa umusirikare wamanitse amaboko binyuranyije n'amasezerano ya Geneva. Guhera intambara yatangira muri Gashyantare 2022, impande zose zikunze gushinjanya kurasa abasirikare bamanitse amaboko.
Ukraine itangaje ko abasirikare babo banika amaboko bakaraswa, nyuma yuko intwaro zikomeje kubabana iyanga, ndetse na OTAN ikaba ivuga ko yiteguye kwakira amakuru mabi yaturuka muri Ukraine.
