Amarira n'amaganya bivanze no kwiheba bidasize n'umujinya, bikomeje kurangwa mu mitima y'abaturage batuye muri Palestine mu Ntara ya Gaza, nyuma yuko Israel isubukuye ibitero byo kwihorera ku mutwe wa Hamas wo muri iyo ntara wabagabyeho ibitero ku wa 07 Ukwakira 2023.
Guhera mu Ukwakira Hamas yagaba ibitero bikomeye kuri Israel, iki gihugu cyarahiriye kwihorera ku kiguzi cyose byasaba; aho kuri ubu bakomeje gusenya ibikorwaremeza bya gisivire bagahitana benshi bavuga ko ari ho aba barwanyi bakambitse.
Kuri iki Cyumweru, Minisiteri y'ubuzima muri Palestine, yemeje ko abantu 10 bishwe na Israel mu gace ka Khan Younis, ari na ko yemeza ko magingo aya nta hantu na hamwe muri Palestine hatekanye abantu baba bahungira. Israel ikaba ivuga ko muri Khan Younis, abahatuye bagomba kuhimuka byihuse kuko ngo ari ho Hamas ifite ibirindiro.
Abarwanyi ba Hamas bagabye igitero kuri Israel biba intandaro y'intambara
Ikigo gishinzwe ubuzima muri UN 'World Health Organization’s (WHO)' kiratangaza ko muri Gaza hakenewe ubutabazi bwihurirwa, kandi ko inzira nziza yo gutanga ubufasha, ari uguhagarika imirwano. Ni mu gihe ikigo gishinzwe ibiribwa ku Isi FAO, kivuga ko 36% by'abanya-Palestine, inzara iri kubahitana.
Ku rundi ruhande, nyuma yuko Amerika itambitse ubudahangarwa bwayo mu muryango w'Abibumbye ivuga ko nta gahenge gakenewe muri Gaza, iki gihugu cyiri kuvuga ko kigiye kugurisha intwaro na Israel z'agaciro ka miliyoni 107 z'amadorari.
Magingo aya, Israel ikaba ivuga ko igomba guhagarika intambara ari uko imaze kurandura burundi umutwe wa Hamas. Kuri ubu, guhera intambara yatangira, Abanya-Palestine barenga 17,700 bamaze gupfa mu gihe Israel yapfushije 14,000.
