Umukinnyi wa firime, Cannon, yirekuye avuga uburyo yasanzwemo indwara ya lupus, ndetse arahira ko iyo bitaba uwahoze ari umugore we Mariah Carey, bishoboka ko atari kuba akiriho.
Nick Cannon yavuze ko Mariah Carey yarokoye ubuzima bwe
Uyu mugabo w'imyaka 42, yashakanye na Mariah Carey muri 2008, baza kubyarana abana babiri, Moroccan na Monroe.
Icyakora, uyu mugabo w'igikimerezwa mu isi ya sinema, yaje gutandukana na Mariah Carey muri 2014, gusa gatanya yabo baje kuyibona nyuma y'imyaka ibiri, nubwo baje gukomeza kwibera inshuti magara.
Mu kiganiro aheruka kugirana n'itangazamakuru, yavuze ko Mariah Carey yamubereye inkingi yo kwiyegamiza, ubwo ubuzima bwe bwari bwanze mu mwaka wa 2012.
Uyu mugabo yavuze ko iyo bitaba imbaraga Mariah Carey yashyize mu kumuvuza, ubuzima bwe butari kurenza uwo mwaka.
Nick Cannon na Mariah Carey babyaranye abana babiri
Yakomeje avuga ko Mariah Carey yamubereye umubyeyi mwiza n'umugore mwiza, ndetse ko amushimira byimazeyi uruhare yagize mu gutuma impyiko ze zidakomeza kwangirika byashoboraga no kumuviramo urupfu.
Nick Cannon, yabyaranye abana babiri na Mariah Carey, nyuma aza kubyarana abandi bana icumi n'abagore batandukanye.
