Umuhanzi uzwi cyane akaba n’umucuruzi, Akon, yahawe umuburo ukomeye na guverinoma ya Senegali asabwa gutangira umushinga wo kubaka umujyi wa Akon, bitabaye ibyo akazatakaza 90 ku ijana(90%) by’ubutaka yahawe.
Uyu mushinga munini ufite agaciro ka miliyari 6 z’amadolari kandi watangijwe ku mugaragaro mu 2020 ku buso bwa hegitari 136 ku nkombe z’inyanja ya Atalantika.
Ikigo cy’igihugu gishinzwe ubukerarugendo n’iterambere ry’inyanja, Sapco-Senegal, kihanangirije Akon kimubwira ko agomba gutangira kubaka ako kanya cyangwa se akamburwa igice kinini cy’ubutaka yemerewe. Nk’uko ikinyamakuru Bloomberg kibitangaza ngo iki cyemezo kibaye nyuma yuko Akon yananiwe kwishyura Sapco inshuro nyinshi.
Igishushanyo mbonera cy'umujyi wa Akon
Guverinoma ya Senegal iteganya ko uwo mushinga uzihutisha iterambere, ndetse ufite amahirwe menshi ku bukungu bw’igihugu no kuzamuka mu bukerarugendo, gusa bagaterwa impungenge no kuba uyu muhanzi nta bushake agaragaza bwo kwihutisha uwo mushinga.
