Abashinja n'abashinjura batangiye gutanga amakuru ku kirego cy'uburiganya mu bucuruzi bw'uwahoze ari perezida wa Amerika, Donald Trump, urubanza ruje rwiyongera kuzindi asanzwe afite zirimo n'iza politiki zitarava mu nzira.
Trump arashinjwa amanyanga mu misoro
Trump we ntabwo akozwa iby'uru rubanza aregwamo kunyereza akayabo ka miliyoni 100 z'amadorari ni ukuvuga arenga gato miliyari 100 z'amanyarwanda, bivugwa ko yanyereje abinyujije mu kubeshya ingano y'imitungo ye.
Umucamanza mukuru Letitia James, arasabira Trump gucibwa amande ya miliyoni 250 z'amadorari, guhagarikwa burundu we n'abahungu be bombi Donald Jr na Eric, kuba bakorera ubucuruzi muri New York, ndetse no guhagarika ibikorwa bye imyaka itanu.
Mu iburanisha ryabaye ku munsi w'ejo, Donald Bender wahoze ari umucungamari mu bucuruzi bwa Trump, yatanze ubuhamya avuga ko uyu mugabo yagiye ahimba ibihombo bikabije, kugira ngo ahunge imisoro.
Trump avuga ko ibirego byose aregwa ari politiki y'abanzi be igamije kumukoma mu nkokora
Mu gihe Donald Trump yahamwa n'ibi birego avuga ko ari ibya politiki bigamije kumuca intege, azahanishwa kwishyura amande, ndetse yamburwe n'impapuro zimwemerera gukora ubucuruzi.
