Abategura ibihembo bya MTV Europe Music Awards bashyizeho icyiciro gishya muri ibi bihembo cya "Best Afrobeats" mu rutonde rwasohotse rw'abazahatana muri uyu mwaka. Abazahatana muri iki cyiciro, barimo: Umufaransakazi Aya Nakamura ndetse n'Abanya-Nigeria: Asake, Arya Starr, Burna Boy, Davido na Rema.
Ni mu gihe mu cyiciro cya "Best African Act" harimo Umunya-Tanzania Diamond Platnumz, aho azaba ahatanye n'abarimo: Asake, Burna Boy, Libianca na Tyler ICU wo muri Afurika y'Epfo. Ku rundi ruhande, indirimbo "Calm down" ya Rema yasubiranyemo na Selena Gomez, iri guhatana mu byiciro bibiri, birimo: 'Best Song’ na ‘Best Collaboration.'
Taylor Swift ahatanye mu byiciro birindwi
Muri ibi bihembo kandi, Burna Boy wo muri Nigeria uheruka gusohora alubumu iri guca ibintu yise "I Told Them " ari mu cyiciro kimwe n'abarimo: Beyoncé, Ed Sheeran, Taylor Swift, The Weeknd ndetse n'abandi mu cyiciro kimwe cya "Best Live Performer”.
Umuririmbyi w'Umunyamerika Taylor Swift akaba ahatanye mu byiciro birindwi harimo: "Best Artist”, “Best Song”, “Best Video” n'abandi. Ibi bihembo by'akataraboneka, bikaba biteganyijwe ko bizatangwa ku wa 05 Ugushyingo 2023 i Paris mu Bufaransa.
