Mu ijoro ryakeye tariki 03 Ukuboza 2022 amaso y’abanyarwanda yose yari yerekeje hariya i Remera muri Kigali [BK] Arena ahari hagiye gutaramira abahanzi b’abanyarwanda aribo Bruce Melodie, Christopher, Kenny Sol , Bushali, Bwiza, Chriss Eazy, Element , Dj Phil Peter ndetse aba bari bagaragiye Joe Boy wo muri Nigeria.
Iki gitaramo cyari kiyobowe na Mc Anita Penda na Mc Buryohe bacurangirwa n’abarimo Dj Tricky, Dj Shooter n’abandi.
Ni igitaramo wabonaga ko ubwitabire atari bwinshi ariko na none atari buke [baringaniye bagera mu bihumbi 5].
Iki gitaramo cyatangiye gitinze bitandukanye n’uko byari biteganyijwe kuko ku isaha ya saa kumi n'ebyiri nk’uko byari byavuzwe ko kizaba gitangiye, wararanganyaga amaso mu bantu bahari, ukabona bangana n’abanyamakuru bagiye mu kiganiro n’itangazamakuru dore ko umuhanzi wa mbere Bwiza yageze ku rubyiniro ahagana saa yine z’ijoro zishyira saa tanu.
Ahagana saa tatu n’indi minota umuriro wabuze muri Kigali Arena
Ubwo abantu biteguraga kwakira umuhanzi, batunguwe no kubona iyi nyubako y’imikino n’imideri ihindutse icuraburindi, abantu barumirwa. Ni ibintu byabaye inshuro itari imwe, ibi biri no mubyadindije iki gitaramo kigatangira gitinze.
View this post on Instagram
Abahanzi baririmbye mu buryo bw’umwimerere buzwi nka [live]
Ubuyobozi bwa Eap [East African promoters] bwari bwatangarije abanyamakuru ko abahanzi bose bazaririmba mu buryo bwa live ndetse ni nako byagenze, kuva ku muhanzi wa mbere Bwiza kugeza kuri Joe Boy washyize akadomo ku gitaramo, bose baririmbye mu buryo bwa live. Itsinda rya Symphony Band niryo ryacurangaga. Keretse iyo umuhanzi yasabaga indirimbo imwe mu buryo bwa "Playback" kubera impamvu runaka.
Abahanzi nyarwanda bashimangiye ubushobozi bwabo mu bitaramo
Kuri uyu mugoroba, imiririmbire n’imyitwarire y’abahanzi nyarwanda yari ntamakemwa bitandukanye no mu bindi bitaramo wasangaga umunyamahanga ariwe wahagurukije abafana benshi. Kuri iyi nshuro siko byagenze kuko uhereye kuri Bwiza waririmbishije abantu indirimbo ze zitandukanye zirimo “Ready’ “Rumours’ n’zindi kugeza kuri Bruce Melodie washimishije benshi kurusha undi muhanzi muri iki gitaramo, bose banyuze abanyarwanda.
Icyakora n’ubwo abahanzi nyarwanda bose bitwaye neza, uwavuga ko Bruce Melodie yabahize ntiyaba abeshye. Iki gitangaza nk’uko yiyita, yataramiye abantu biratinda mu ndirimbo ze nyinshi ndetse cyane umuntu atarondora zirimo “Akinyuma’ Funga macho, Uzandabure, Urabinyegeza n’izindi zatumye buri umwe abonako urubanza rw'umuhanzi mwiza muri iki gitaramo ari urucabana.
Uretse Bruce Melodie wahize abandi, Kenny Sol nawe ntiyari yoroshye
Umuhanzi Kenny Sol yahagurukije imbaga nyamwinshi nyamara yagiye ku rubyiniro rw’igitaramo bisa nk’aho kitaratangira kuko yari umuhanzi wa Gatatu ku rubyiniro. Mbere y’uko ajyaho, wabonaga abantu batarizihirwa cyane ndetse bamwe bari bakiri hanze ariko Kenny Sol yahise abegeranya, igitaramo gitangira ubudahagarara.
Binyuze muri "Haso' Say My Name' "Joli' n'zindi za Kenny Sol yashimishije abatari bake.
Kenny Sol ubwo yari ku rubyiniro arimo kuririmba indirimbo “Quality’ yakoranye n’umuhanzi wo mu Burundi Double Jay, yajugunyweho isutiye [umwenda w’imbere abagore n’abakobwa bambara ku mabere].
Bushali yongeye kuzana umwana we ku rubyiniro.
Bushali washimishije benshi mu gitaramo “Kigali Fiesta” yongeye akora nk’ibyo yari yakoze tariki 17 Nzeri 2022 muri Bk Arena n’ubundi ubwo yari mu gitaramo cya “Rap City concert” akazana umwana we w’umuhungu “Bushali moon” ku rubyiniro.
Bwiza wanyuze benshi yaserukanye n’abasore bikoreye umuriro ku mutwe.
Chriss Eazy nawe yasusurukije abatari bake.
Anita Penda yerekanye ubuhangange mu kuyobora ibitaramo
MC Anita Penda ubwo yageraga ku rubyiniro rw’igitaramo “Kigali Fiesta” asimbuye Mc Buryohe, yahise ahindura ibintu ubona abantu bahise
Umuhanzi Joe Boy ntiyorohewe n’urubyiniro rwabanjeho Bruce Melodie
Umuhanzi Joe Boy wo muri Nigeria ntiyaraye yorohewe n’urubyiniro rwa Kigali Arena kuko ubwo yageraga ku rubyiniro ahagana saa saba na 40 z’ijoro abantu bahise batangira gutaha.
View this post on Instagram
Bamwe mu bafana The Choice Live twavuganye nabo barimo gutaha ubwo Joe Boy yari akijya ku rubyiniro, bavuze ko impamvu yo gutaha ari uko Joe Boy yatinze kuza ku rubyiniro cyane kandi Bruce Melodie yamaze iminota myinshi yavuyeho, bamwe bati “Joe Boy ntahagije ku buryo yagumisha abantu muri Arena saa cyenda z’ijoro, byasaba undi utari we rwose”.
Aba bafana bijujutiye ukuntu Bruce Melodie yavuye ku rubyiniro saa saba,hagashira isaha nta muhanzi urajyaho kandi bwari bwije cyane.
Umwe mubo twaganira ubarizwa mu myidagaduro utashatse ko tuvuga amazina ye, yavuze ko impamvu Joe Boy yatinze kuza ku rubyiniro, ari uko banze kumushyiraho igitutu cya Bruce Melodie.
Ati “Urabona ko Bruce Melodie yagize performance y’agatangaza, uzanye Joe Boy ako kanya byamusaba imbaraga nyinshi kugirango bagume kuri uru rwego, rero kumutinza agasanga abantu bongeye gukonja ni mu nyungu ze kuko bake bari basigayemo yabanyuze”.
Producer Element nyuma yo kudahirwa n'urubyiniro rwa mbere, kuri iyi nshuro yagaragaje ubuhanga budasanzwe mu ndirimbo "Kashe".
