Amakipe 22 yaraye amenye amatsinda azaba aherereyemo muri Euro2024 izabera mu Budage, mu gihe andi makipe abiri ataramenyekana kuko azava mu mikino ya kamarampaka.
Iikipe izegukana iki gikombe kizakinirwa mu mijyi itandukanye yo mu Budage, izegukana miliyoni 24 z'amapawundi mu gihe yaba yarabashije gutsinda imikino yose yakinnye.
Ikipe izitabira imikino ya Euro2024 izaba yizeye gutahana atari munsi ya miliyoni 7.9 z'amapawundi, ikipe izajya itsinda umukino umwe mu matsinda ihabwe ibihumbi 856 by'amapawundi, naho ninganya umukino wo mu matsinda ihabwe ibihumbi 428 by'amapawundi.
Miliyari zisaga 300 Frw zizagabanwa n'amakipe azitabira Euro2024
Uko amakipe azagenda azamuka niko n'amafaranga ahabwa azagenda yiyongera. Ikipe izabasha kugera muri kimwe cya munani azahabwa miliyoni 1.28 y'amapawundi, nigera muri kimwe cya kane yongerwe miliyoni 2.14 z'amapawundi, naho nigera muri kimwe cya kabiri yongerwe miliyoni 3.42..
Ikipe izatsindirwa ku mukino wa nyuma izahabwa miliyoni 4.28 naho izatwara igikombe ihabwe miliyoni 6.85 z'amapawundi. Ibi bivuze ko ikipe izatwara igikombe mu gihe yaba yaratsinze imikino yose yo mu matsinda yahabwa igiteranyo cya miliyoni 24 z'amapawundi.
Euro2024 itegerejwe n'abatari bake izatangira tariki 14 Kamena 2024, irangire tariki 14 Nyakanga muri uwo mwaka, ikaba izabera mu Budage umukino wa nyuma ukabera kuri Stade Olempike ya Berlin.
Uko amatsinda ya Euro2024 azaba ahagaze
U Butariyani nibwo bwegukanye Euro iheruka
