Dua Lipa ahanganye n'urundi rubanza kubera imwe mu ndirimbo ze zakunzwe cyane yitwa "Levitating".
Uyu muhanzikazi ni umwe mu bakunzwe ku isi, ariko ubu aregwa n'umugabo utunganya umuziki(producer) Bosko Kante.
Dua Lipa yongeye kuregwa ku nshuro ya gatatu.
Ku munsi wo ku wa Mbere, i Los Angeles, ikirego kijyanye n'uburenganzira ku bihangano(copyright claim) gihagaze miliyoni z'amadolari cyaratanzwe, aho Kante avuga ko Dua Lipa na Warner Music Group bakoresheje mu buryo bunyuranyije n’amategeko bimwe mu bihangano bye, ubwo bakoraga imwe mu ndirimbo zamenyekanye cyane kuri alubumu ye ya 2020, "Future Nostalgia".
Ibyo Kante asaba Dua Lipa
Uru ni urubanza rwa gatatu Dua Lipa arezwemo kubera iyi ndirimbo yakunzwe n'abatari bake. Byongeye kandi, Kante arasaba umubare munini w'amafaranga. Miliyoni ebyiri z'amadolari y’indishyi, miliyoni 20 z'igihombo byamuteje, n’ibindi byinshi birimo n'ayo guhemba abavoka.
Mu buhamya bwa Kante, avuga ko yaremye injyana n'amagambo ku ruhande rwe kandi yemeranya n'aba-producers ba Dua Lipa ko batagomba kubikoresha. Ariko, mu gusubiramo imdirimbo "Levitating" Dua Lip yakoranye na Madonna, icyo cyifuzo nticyakurikijwe.
Dua Lipa arasabwa akayabo ka miliyoni zirenga 20 z'amadolari
'Levitating' ubu imaze kuregwa mu manza eshatu ku bantu batatu batandukanye mu ruganda rwa muzika. Bwa mbere, yarezwe na Artikal Sound System, bashinjaga uyu muhanzikazi kwigana indirimbo yabo ya reggae yitwa "Live Your Life" yo mu 2017, ariko iki kirego byarangiye giteshejwe agaciro.
Ikirego cya kabiri, cyari icy'abanditsi b'indirimbo, L. Russell Bown na Sandy Linzer, bavuze ko Dua Lipa n'itsinda rye bibye injyana ya "Wiggle and Giggle All Night" yo mu 1979, na "Don Diablo" yo 1980, mu gihe uwari utahiwe yari Kante.
