Iminsi Icyenda iratambutse mu burasirazuba bwa Repubulika Iharanira Demokarasi ya Congo imirwano idakuraho hagati y'ingabo z'iki gihugu FARDC ndetse n'umutwe witwaje intwaro wa M23. Guhera ku wa Gatanu, mu bice byo muri Teritwari zirimo: Masisi, Rutshuru na Nyiragongo, umuriro urimo kwaka.
Kuri uyu wa Mbere, imirwano imeze nabi muri Teritwari ya Rutshuru mu gace ka Tongo, aho dorone n'imbunda zikomeye ziri kurwanishwa. Maj Willy Ngoma umuvugizi wa M23 mu byasirikare, akaba yatangaje ko FARDC ariyo yatangije imirwano kandi ngo bari gukoresha imbunda ziremereye, ariko ngo nabo bari guhangana nazo.
Kuri uyu wa Mbere M23 na FARDC bari kurwanira muri Tongo
Ku rundi ruhande, uyu mutwe urashinja FARDC kwibasira abasivile babagabaho ibitero biri guhitana benshi. Ni mu gihe kandi, ingabo za Leta ziri kwigamba kwivugana abarwanyi benshi buyu mutwe hakoreshejwe indege zitagira abapiloti ndetse n'indege za gisirikare. Gusa Willy Ngoma akaba yemeza ko nubwo bari kuraswa nizo dorone, ariko ngo nta ngabo ziri kuhagwa nkuko babivuga.
Mu gihe imirwano ikomeje gukaza umurego, M23 ikomeje gushinja ingabo z'Uburundi kuba abacanshuro kuko ngo ziri gufatanya n'ingabo za DR-Congo kubarwanya kandi zaragiye mu butumwa bw'umuryango wa Afurika y'Iburasirazuba kugarura amahoro muri iki gihugu.