Ku wa Kabiri tariki ya 27 Gashyantare 2024, nibwo polisi yo muri Afurika y'Epfo yatangaje ko abantu batandatu bakekwaho gucura umugambi wo kwica umuraperi rurangiranwa Kiernan Forbes amazina nyakuri ya AKA, batawe muri yombi barafungwa.
Tariki ya 10 Gashyantare 2023, nibwo inkuru y'incamugongo yasakaye hose ko umuraperi AKA wari ufite imyaka 35, yishwe arasiwe ku nzu y'uburiro ya 'Durban Restaurant', muri Afurika y'Epfo, byari mbere gato yuko ajya kuririmba mu kabyiniro kari hafi yiyo resitora.
Abakekwaho kwivugana AKA batawe muri yombi
Minisitiri wa Polosi muri Afurika y'Epfo Bheki Cele, mu kiganiro n'itangazamakuru, yavuze ko abantu batandatu kuri ubu ari bo bafashwe, kandi ko urutonde rw'abashakishwa ruriho abantu 36 bashobora no kwiyongera.
Ni mu gihe Polisi yemeje ko abantu nyirizina bacuze uwo mugambi, ari babiri kandi batawe muri yombi. Abafashwe, kuri Kane nibwo bazagezwa mu Rukiko baburanishwe.
Mu bantu bose bakekwaho uruhare mu rupfu rwa AKA, bikaba byemejwe ko harimo babiri bo muri Eswatini, aho byasabye ko hitabazwa Polisi Mpuzamahanga Interpol, nk'uko byemejwe na Nhlanhla Mkhwanazi umuyobozi wa Polisi mu Ntara ya KwaZulu-Natal.
Umuraperi AKA witabye Imana mu 2023 arashwe
Afurika y'Epfo, ni kimwe mu bihugu bibamo iraswa ry'abantu benshi biganjemo ibyamamare mu muziki. Urupfu rwa AKA, rwaje rukurikira urwa rurangiranwa mu njyana ya reggae Lucky Dube wishwe mu 2007.
Nk'uko bigaragazwa n'imibare ya Polisi aho muri Afurika y'Epfo, abantu 84 bararashwe guhera mu Ukwakira kugera mu Ukuboza 2023.
AKA ukomoka muri Afurika y'Epfo
