Umuhanzi wo muri Colombia Shakira, yamaze kugezwa mu nkiko zo muri Espagne mu Ntara ya Barcelona, aho ashinjwa kunyereza imisoro. Uyu muhanzikazi wabaye umugore w'umukinnyi Gerard Piqué wakinaga mu kipe ya FC Barcelona, ubushinjacyaha bukaba busaba urukiko ko yafungwa ndetse akishyura n'amande.
Ubushinjacyaha bukaba busaba ko uyu muririmbyi w'imyaka 46 yafungwa imyaka umunani kubera kunyereza mafaranga angana na miliyoni 14.5 z'amayero yanyereje hagati ya 2012 ndetse na 2014. Bakaba bemeza ko aya mafaranga yayakiriye avuye mu ngendo mpuzamahanga yakoze, ariko ntiyayatangaho umusoro.
Umuhanzi Shakira arasabirwa imyaka 8 mu gihome
Ubucamanza muri Espagne buravuga ko Shakira yamaze igice cy'umwaka w'imisoro atishyura imisoro biciye muri Kompanyi mpimbano. Nyamara rero, uyu muhanzi mu 2022, yatangarije ikinyamakuru Elle magazine ko yishyuye ibintu byose bijyanye n'imisoro, ko ari inyange.
Abashinjacyaha bagendeye kuri uku kunyereza imisoro kwa Shakira, bukaba busaba urukiko ko yahanishwa gufungwa imyaka umunani n'amezi abiri ndetse akishyura n'amande angana na miliyoni 24 z'amayero.
Shakira wari umugore wa Gerard Piqué arashinjwa kunyereza imisoro muri Espagne
Uretse inkiko zo muri Espagne zishinja Shakira kunyereza imisoro, ariko kandi iperereza ry'abanyamakuru bigenga ryakozwe ku inyerezwa ry'amafaranga bikozwe n'abakomeye mu isi muri raporo yabo bise “Pandora Papers”, berekanye ko Shakira hari imitungo afite muri Bahamas mu buryo bunyuranyije n'amategeko.
Ntabwo ari Shakira w'umusitari ukurikiranwe n'inkiko zo muri Espagne kubera kunyereza imisoro, dore ko mu myaka yashize abarimo Christiano Ronaldo ndetse na Lionel Messi nabo bagejejwe mu nkiko.
