Ikipe ya FC Barcelona ibiganiro biri kugana ku musozo aho stade yayo ya Camp Nou bizarangira yiswe Spotify Camp Nou mu minsi itarambiranye iri imbere.
Inkuru dukesha ikinyamakuru SPORT cyandikira muri Espagne, iravuga ko impande zombi zenda kwemeranya ndetse ko bishobora kutarenza mu mpeshyi stade itarahindurirwa izina, ari nabwo iyi stade izaba itangiye kuvugururwa.
Mu mwaka w'imikino wa 2023-2024, ikipe ya FC Barcelona izaba ikinira kuri stade yitwa Estadi Olímpic de Montjuic stadium iri hafi muri Barcelona mu gihe Camp Nou izaba rimo ivugururwa.
Nk'uko byatangajwe na Sportsmail muri Gashyantare, Spotify izatanga miliyoni 237 z'amapawundi muri FC Barcelona, ndetse ikipe ya FC Barcelona ikajya yambara imyenda yanditseho Spotify mu gatuza, yaba ikipe y'abagabo, iy'abagore ndetse no mu myitozo yazo.
Ubusanzwe FC Barcelona nta muterankunga yajyaga yambara ku mupira wayo imbere kugeza mu 2006 ubwo yagiranaga amasezerano na Unicef, ikaba ariyo ya mbere yagaragaye ku mupira wa FC Barcelona.
Mu 2011 nibwo FC Barcelona yasinyanye na Qatar foundation birangira ibaye Qatar Airways, ariko nayo batandukana nayo mu 2017. Aha FC Barcelona yahise isinyana na Rakuten ariko nayo amasezerano ararangirana n'uyu mwaka w'imikino.
Kompanyi ya Spotify yakomanze muri FC Barcelona nyuma y'amezi macye nyirayo Daniel Ek agerageje kugura ikipe ya Arsenal, ariko Stan Kroenke akamubera ibamba.
Daniel Ek yagerageje gutanga miliyari 1.8 yamapawundi ngo agure Arsenal biranga, ndetse yarimo yitegura gutanga miliyari ebyiri z'amapawundi ariko Stan Kroenke yanga kugurisha ikipe.
Daniel Ek yinjiye muri FC Barcelona amaze kubura Arsenal(Image:Reuters)
Nyuma yo kuvugururwa izitwa Spotify Camp Nou(Image:Agoda)
