Kuri uyu wa gatandatu nibwo Chelsea yatsinze Palmeiras hitabajwe iminota 30 y'inyongera kuko iminota 90 yari yarangiye amakipe yombi anganya igitego kimwe kuri kimwe, bituma Chelsea yegukana igikombe cy'isi.
Chelsea ikaba yatwaye iki gikombe cy'isi nyuma y'uko yatwaye UEFA champions league ndetse na UEFA super cup muri aya mezi ikenda ashize.
Nyuma y'uyu mukino, Umudage Thomas Tuchel utoza Chelsea yabwiye ikipe ye ko ubu buri wese afitiye Chelsea ishyari nyuma y'uko batwaye igikombe cy'isi cya mbere mu mateka ya Chelsea.
Thomas Tuchel yagize ati:"Mu rwambariro twavuze ngo mbega amahirwe, buri wese adufitiye ishyari.
"Nk'abahungu, twarotaga imikino ya nyuma nk'uyu. Ntabwo byari bisanzwe kandi twashakaga gukina nta kwicuza.
"Iyo utsinze igitego mu minota ya nyuma, uba ukeneye amahirwe ngo ubikore. Ntitwacikaga intege, twakomeje kugerageza, ntitwarekeye. Ntitwacitse intege.
"Twari tuyoboye, baratwishyura, ariko ntitwarekeye kwataka. Ubwo rero ndatekereza ko twari tubikwiye ariko iyo utsinze mu minota ya nyuma biba ari amahirwe."
Ikipe ya Chelsea igiye guhanga amaso undi mukino wa nyuma dore ko izakina na Liverpool ku mukino wa nyuma wa Carabao cup muri uku kwezi.
Iyi kipe kandi iracyahataniye FA cup dore ko izakina n'ikipe ya Luton town tariki 02 Werurwe 2022.
Ku ruhande rwa shampiyona ho bisa nk'aho abasore ba Thomas Tuchel bamaze kumanika amaboko, dore ko bicaye ku mwanya wa gatatu barushwa amanota 16 na Manchester City iri ku mwanya wa mbere.
Chelsea yegukanye igikombe cy'isi itsinze Palmeiras(Net-photo)
Thomas Tuchel yemeza ko buri wese afitiye ishyari Chelsea(Net-photo)
