Intambara ihanganishije u Burusiya na Ukraine ishyigikiwe n'Uburengerazuba bw'Isi igeze mu mahina, aho magingo aya ubu iri kurwanirwa mu bihugu byombi, nyuma y'uko Ukraine nayo itangije igitero ku butaka bw'u Burusiya.
Kuri uyu wa Kane, Minisiteri y'Ingabo mu Burusiya, yatangaje ko Ingabo zabo zafashe umudugudu w'ingenzi wa Ivanivka uri mu bilometero 10 uvuye mu mugi wa Pokrovsk mu Ntara ya Donesky yemeje ko ari intara y'u Burusiya guhera muri Nzeri 2022.
Iyi Minisiteri kandi, iratangaza ko ingabo zabo zikomeje gutera intambwe mu bindi bice nka Kharkhiv, Luhansk na Donetsk.
Mu gihe u Burusiya bwigamba gutanga isomo rya gisirikare ku butaka bwa Ukraine, Umugaba Mukuru w'Ingabo za Ukraine Gen. Oleksandr Syrskii nawe aravuga ko igirikare cyabo cyarangije gushinga ibirindiro bya mbere bya gisirikare mu Burusiya.
Gen. Syrskii aravuga ko bashinze ibirindiro mu gace ka Kursk baheruka kugabamo ibitero bikomeye, ndetse ko bamaze gufata ibilometero 35 muri iyo Ntara.
Bamwe mu bayobozi bo muri Ukraine, baratangaza ko bakoze igitero mu Burusiya bazi ko ingabo zabo zihita zicika intege, none ngo barabona nta kidasanzwe cyabahindutseho bagahera ku gace ka Pokrovsk bongeye gufata.
