Manchester United yaciwe amafaranga agera ku bihumbi 300 by'amayelo kubera kwica amwe mu mabwiriza ya UEFA agenga imikoreshereze y'amafaranga.
FC Barcelona na Manchester United ziri mu makipe yafashwe na UEFA mu igenzurwa ryakozwe hagati ya 2019 na 2022, hagenzurwa uko amakipe yakoresheje amafaranga hagati y'iyo myaka.
Iyi kipe yo mu Bwongereza yavuze ko yakiriye ndetse yemeye iki gihano yahawe na UEFA, impuzamashyirahamwe ivuga ko ari ikosa rito ryakozwe bitaremereye ku buryo yagenerwa ibindi bihano.
Manchester United iri mu makipe yahanwe (Image:Getty)
UEFA kandi yageze no ku ikipe ya FC Barcelona nayo isanga hari amakosa yakozwe mu mikoreshereze y'ubukungu nayo icibwa ibihumbi 500 by'amayelo nabyo bidakurikiwe n'ikindi gihano.
UEFA ivuga ko FC Barcelona yahamwe n'icyaha cyo gutanga raporo itariyo mu 2022 ku bijyanye n'amafaranga yungutse, kikaba ari icyaha nacyo ariko kitaremereye nk'uko byagaragajwe.
Andi makipe arimo AC Milan, Besiktas, Inter Milan, Marseille, Monaco, AS Roma na Paris Saint-Germain byari byavuzwe ko nazo zishobora guhanwa, ariko zo UEFA yatangaje ko yasanze zarubahirije amabwiriza ariko ikaba irakomeza gukora igenzura.
Ikipe ya FC Barcelona nayo iri mu makipe yahanwe(Net-photo)
