Umuhanzi mu njyana ya Hip-Hop Jay-Z aravugwaho ko yifuza kugura ikipe ya Tottenham nyuma y'ibirego umuherwe wayo Joe Lewis ari gushinjwa.
Joe Lewis w'imyaka 86 yagejejwe imbere y'ubushinjacyaha ku wa Gatatu tariki 25 Nyakanga 2023 i Manhattan, aho ashinjwa forode mu bucuruzi yagiranye n'inshuti ze ndetse n'uwahoze ari umukunzi we.
Inkuru dukesha ikinyamakuru Express, iravuga ko umugabo w'umuhanzikazi Beyonce ariwe Jay-Z, yifuza kuba yagura iyi kipe iherereye mu mujyi wa Londo mu Bwongereza.
Ibyo Joe Lewis akomeje gushinjwa bishobora gutuma agurisha Tottenham
Jay-Z w'imyaka 53 abarirwa umutungo ufite agaciro ka miliyari 1.95 z'amapawundi, kongeraho miliyoni 420 z'umugore we Beyonce, bakura mu mwuga wabo wo kuririmba ndetse n'indi mishinga yo ku ruhande.
Ikipe ya Tottenham ibarirwa agaciro ka miliyari ebyiri z'amapawundi. Jay-Z ufite imigabane mu ikipe ya Brookyln Nets yo muri NBA, yiteguye gushaka abo bafatanya bakagura Tottenham.
Si ubwa mbere umuhanzi Jay-Z yaba avuzweho gushaka kugura ikipe muri Premier League, kuko mu myaka 13 ishize yavuzweho gushaka gushora imari mu ikipe ya Arsenal ndetse we ubwe akaba yarigeze kuvuga ko yari umufana wa Thierry Henry.
Jay-Z arifuza kugura Tottenham(Net-photo)
