Bivugwa ko Angel Di Maria w'imyaka 34 yaba yaremeye kwerekeza mu ikipe ya FC Barcelona nyuma y'uko yifuzwaga cyane n'ikipe ya Juventus, dore ko yamaze kwemeza ko azava muri PSG.
Di Maria wakiniye Real Madrid imikino 194 hagati ya 2010 na 2015, ashobora kwinjira muri mukeba wayo FC Barcelona atitaye ku mubano yagiranya n'abafana ba Real Madrid.
Angel Di Maria akiri muri Real Madrid (Inage:Getty)
Gusa ibi Angel Di Maria abikoze ntiyaba ariwe mukinnyi wa mbere ubikoze kuko hari abakinnyi basaga 37 babikoze mbere ye, bagakinira aya makipe abiri y'amakeba akomeye.
Luis Figo
Luis Figo yakoze ibintu bikomeye cyane mu 2000 ubwo yari umukinnyi ukomeye cyane wa FC Barcelona, ariko yayivuyemo ahita yerekeza muri Real Madrid. Nyuma y'umwaka umwe gusa uyu munya-Portugal yahise yegukana Ballon d'Or.
Figo yakiniye Real Madrid na FC Barcelona imikino 200 abasha gutwara La liga buri hamwe, ndetse i Madrid ho yongeraho na UEFA Champions league.
Uko Luis Figo yagarukaga i Camp Nou buri gihe byabaga ari urugamba rutoroshye kuko abafana ba FC Barcelona bamwitaga umugambanyi, ndetse ntibabure kumwereka umujinya bamufitiye.
Luis Figo yavuye muri Barcelona yerekeza muri Real Madrid
Ronaldo
Ronaldo Luis Nazario ni undi mukinnyi ukomeye wakiniye aya makipe abiri, ariko we ntabwo yavuye muri imwe ngo ahite yerekeza mu yindi ako kanya.
Uyu munyabigwi w'umunya-Brazil yatsinze ibitego 47 mu mikino 49 yakiniye FC Barcelona mu mwaka w'imikino wa 1996-97, ahita ayivamo yerekeza muri Inter.Milan yo mu Butariyani.
Ronaldo yaje kugaruka muri Real Madrid mu 2002 kuyobora ubusatirizi bwa Galacticos yari irimo abakinnyi benshi b'amazina akomeye muri icyo gihe barimo Zinedine Zidane, Roberto Carlos, Fernando Hierro, Rául, Figo, Guti, Cambiasso, Salgado n'abandi.
Mu gihe Ronaldo yamaze i Madrid yabaswe n'imvune cyane ariko n'ubu aracyakunzwe n'abafana ba Real Madrid cyane, ndetse afatwa nk'umwe muri ba rutahizamu ba mbere babayeho.
Ronaldo nawe yakiniye FC Barcelona na Real Madrid
Samuel Eto'o
Uyu munyabigwi wa Afurika yabonywe mbere n'aba-scout ba Real Madrid ndetse bamujyana muri Esipanye ariko kumenera mu ikipe ya mbere biramunanira.
Nyuma yo kumureka akerekeza muri Mallorca, mu 2004 yasiniye FC Barcelona aho yaje kuba umwe mu bakinnyi bakanganye ku isi y'abazima.
Uyu mugabo yatsindiye FC Barcelona ibitego 130 byose ndetse atwaramo ibikombe bikomeye birimo La liga eshatu na Champions league ebyiri mbere yo kwerekeza muri Inter.Milan ya Jose Mourinho mu 2009.
Samuel Eto'o yari umwana wa Real Madrid amurikira i Barcelona
Alfredo Di Stefano
Uyu munya-Argentina ni umwe mu bakinnyi bakomeye isi yaba yaragize, gusa ntiyigeze akinira FC Barcelona ku buryo mu marushanwa yemewe na FIFA.
Gusa uburyo Real Madrid yamwambuye FC Barcelona nibyo bituma agaragara kuri uru rutonde, ndetse ni inkuru iryohera abafana ba Real Madrid cyane itajya isaza mu matwi yabo.
Di Stefano yavuye mu ikipe ya Millonarios yo muri Colombia mu 1953, aho FC Barcelona na Real Madrid zose zashakaga kumusinyisha.
Nyuma y'inkundura ikomeye yari hagati y'aya makipe akomeye muri Esipanye bapfa uyu mukinnyi, ishyirahamwe ry'umupira w'amaguru muri Esipanye ryemeje ko uyu mugabo yakinira aya makipe yombi mu bihe bitandukanye. Akabanza agasinyira imwe, amasezerano yarangira akazajya mu yindi.
Alfredo Di Stefano yakoze imyitozo muri FC Barcelona ndetse anayikinira mu mikino ya gicuti mbere yo gutangira umwaka w'imikino muri Real Madrid.
Alfredo Di Stefano yateje intambara hagati ya FC Barcelona na Real Madrid
Nyuma yo kugorwa n'ubuzima i Madrid, FC Barcelona yemeye kugurisha Real Madrid ayo masezerano bari bafitanye n'uyu mukinnyi yo kuzabakinira. Icyo Di Stefano yishyuye FC Barcelona nuko bahuye akabatsinda ibitego bitatu mu mukino.
Ibyo uyu mugabo yakoreye Real Madrid byo ntibisanzwe kuko yayitsindiye ibitego 308 mu mikino 396 yonyine yayikiniye, atwaramo ibikombe umunani bya La liga ndetse anatwara European cup eshanu twakwita nka Champions league ubu.
Abo ni bamwe mu bakinnyi bakomeye bavugishije amangambure abafana b'aya makipe yombi kubera ibyo bagiye bayakorera ariko urutonde rw'abayakiniye yombi ni rurerure.
Ku rutonde hariho Luis Enrique, Michael Laudrup, Gheorghe Hagi, Alfonso Albeniz, Lorenzo Amador, Jose Angel Berraondo, Albert Celades, Arsenio Comamala, Evaristo de Macedo, Enrique Normand Faurie, Mariano Garcia de la Puerta, Daniel Garcia Lara, Fernand Goyvaerts, Hilario, Laszlo Kaszas, Luciano Lizarraga, Julen Lopetegui, Luis Milla, Lucien Muller, Fernando Munoz, Alfonso Navarro, Chus Pereda, Alfonso Perez, Robert Prosinecki, Jose Quirante, Walter Rozitsky, Josip Samitier, Javier Saviola, Bernd Schuster, Miquel Soler, Justo Tejada, Ricardo Zamora.
Birashoboka cyane ko umunya-Argentine Angel Di Maria ashobora kwiyongera kuri uru rutonde dore ko we yamaze gutangaza ko gukinira FC Barcelona ntacyo ubu byamutwara.
Gusa i Barcelona bo bibateye ikibazo ukuntu abakinnyi bakomeje kwinjiza mu ikipe ari abakinnyi bakuze gusa, none bakaba bakwinjiza na Di Maria ku myaka 34 kandi bashaka gukora umushinga w'igihe kirekire.
