Mukhaled Al-Raqadi yari umunya-Oman w'imyaka 29 ndetse akaba myugariro w'ikipe ya Muscat FC yo muri icyo gihugu ariko akaba yitabye imana azize indwara y'umutima.
Kuri uyu wa Gatatu ubwo ikipe ye ya Muscat FC yari igiye gukina n'ikipe ya Al-Suwaiq mu mikino ya shampiyona, Al-Raqadi yagize ikibazo cy'umutima mbere y'umukino bakiri mu mwanya wo kwishyushya.
Uyu musore yahise ajyanwa kwa muganga byihuse hakoreshejwe imbangukiragutabara ariko ku bw'amahirwe macye birangira uyu mugabo yitabye Imana.
Ikipe ya Muscat FC yatangaje inkuru y'urupfu rwe ku butumwa bashyize ku rubuga rwabo rwa twitter.
Bagize bati:"Hamwe n'imitima yuje kwizera ndetse no kwakira ubushake bw'Imana, ubuyobozi bw'ikipe ya Muscat FC bwihanganishije umuryango wa Al-Raqadi.
"Dusabye Imana kumugirira impuhwe. Twizerera mu Mana kandi mu Mana tuzagaruka."
Iyi nkuru ije nyuma y'uruhererekane rw'inkuru z'abakinnyi zimazeho iminsi bagenda bagira ibibazo by'indwara y'umutima.
Ubu nibwo umunya-Denmark witwa Christian Eriksen ari kugerageza kugaruka mu kibuga nyuma yo gufatwa n'ikibazo cy'umutima muri Euro2020 ku mukino wahuzaga Denmark na Finland.
Ubuzima bwa Christian Eriksen bwari hagati y'urupfu n'umupfumu ubwo yagwaga hasi ntawe umukozeho ariko guhumeka bikanga. Ku bw'amahirwe ubu arahumeka uw'abazima.
Eriksen aherutse kumvikana na Inter.Milan gusesa amasezerano nyuma yo kumenya ko amategeko ya Serie A atamwemerera gukina mu Butariyani yarigeze kurwara umutima.
Undi uheruka kubabaza abakunzi ba ruhago benshi ni Sergio Aguero wahoze ari rutahizamu wa Manchester City. Uyu mugabo watakiraga FC Barcelona yagiriwe inama yo guhagarika gukina umupira w'amaguru kubera indwara y'umutima.
I Camp Nou, uyu mugabo w'imyaka 33 yatangaje ko ahagaritse gukina umupira w'amaguru mu marira menshi kuko nta n'igice cy'umwaka w'imikino yakiniye FC Barcelona.
Muri Manchester United kandi naho haherutse kugaragara ubwoba ko myugariro Victor Nelson Linderlof yagira iki kibazo.
Muri uku kwezi ubwo Manchester United yakinaga na Norwich, uyu musore yasohotse mu kibuga aribwa mu gatuza. Akomeje gukurikiranwa ngo harebwe ko nawe ataba afite indwara y'umutima.
Al-Raqadi yitabye Imana afite imyaka 29(Image:The sun)
Uyu mugabo yakiniraga ikipe ya Muscat FC(Image:Feed Lily)
Aguero yasezeye umupira w'amaguru mu marira(Image:Eurosport)
