Kuri uyu wa Gatandatu nibwo Cristiano Ronaldo yongeye gukora ibyo azi cyane kurusha ibindi aribyo gushyira umupira mu nshundura, aho yatsinze ibitego bitatu byahaye intsinzi ikipe ye yatsinze Norwich ibitego 3-2.
Nk'uko byatangajwe n'ikinyamakuru The sun, Cristiano Ronaldo agomba kwakira ibihumbi 850 by'amapawundi(Asaga miriyari 1.1 mu manyarwanda) nk'uko byanditse mu masezerano ye.
Cristiano Ronaldo yinjije akayabo nyuma yo gutsinda Norwich(Net-photo)
Ubwo yagarukaga muri Manchester United muri uyu mwaka w'imikino, Cristiano Ronaldo yasinye amasezerano arimo ingingo ivuga ko nageza ibitego 20 mu mwaka w'imikino azahabwa ibihumbi 750 by'amapawundi by'agahimbazamusyi, ndetse akaba yanabariwe ibindi bihumbi 100 by'amapawundi kubera ibitego bitatu mu mukino umwe.
Ibitego bitatu yatsinze byatumye yuzuza ibitego 20 byanditse mu masezerano anarenzaho ikindi biba 21. Nyuma y'aha kandi bigaragara ko Cristiano Ronaldo ashobora gukorera andi mafaranga menshi avuye mu duhimbazamusyi, dore ko nyuma y'ibi bitego mu masezerano ye handitsemo ko igitego azajya atsinda nyuma y'uko yujuje ibitego 20 kizajya kibarirwa ibihumbi 100 by'amapawundi.
Ubwo uyu mwaka w'imikino uzaba urangiye, Manchester United izatanga miliyoni imwe y'amapawundi ku mukinnyi wayo watsinze ibitego byinshi kurusha abandi muri uyu mwaka w'imikino. Bigaragara ko aya mafaranga nayo Cristiano Ronaldo azayafata kuko arusha Bruno Fernandes umukurikiye ibitego 12 byose.
Bruno Fernandes arushwa na Cristiano ibitego 12(Net-photo)
Muri rusange Cristiano Ronaldo yafata miliyoni 2.75 z'amapawundi mu gihe yaba abashije kugeza ibitego 30 muri uyu mwaka w'imikino, aho irushanwa bakirimo ari shampiyona ya Premier league gusa.
Cristiano Ronaldo yagarutse muri Manchester United mu mpeshyi ishize ubwo yavaga muri Juventus, ariko ntiyorohewe n'abamunenga muri Premier league nyuma y'aho Manchester United ititwaye nk'uko abakunzi bayo batekerezaga.
Gusa n'ubwo ikipe yo bitagenze neza, ku ruhande rw'uyu munya-Portugal we nta cyo atakoze kuko amaze gutsinda ibitego 15 muri Premier league, ndetse n'ibitego bitandatu muri Champions league.
