Comedy Store UG ni ibitaramo by'urwenya bihuza abahanzi n'abanyarwenya bikabera i Kampala muri Uganda. Icy'uyu munsi tariki ya 20 Kanama 2025 kiraba kirimo ibyamamare bitandukanye mu bahanzi n'abanyarwenya kibere i Lugogo muri UMA Showgrounds.
Iki gitaramo, biteganyijwe ko kiyoborwa na Alex Muhangi, Kalela the Comedian na Bree, kiraza kuba gihujwe no kwishimira intsinzi y'ikipe y'umupira w'amaguru y'igihugu ya Uganda. Iyi kipe iherutse gutsinda iya Afurika y'Epfo mu irushanwa rya CHAN 2024.
Ni mu mukino ikipe y'igihugu ya Uganda yari yakiriye itsindamo 3-1 nyuma y'uko ikipe zombi zari zinganyije 3-3 mu mukino wari wabanje wakiriwe na Afurika y'Epfo. Uganda yahise ikatisha itike yo kwerekeza muri 1/4 cy'irangiza muri iri rushanwa rya CAF African Nations Championship (CHAN) 2024.
Usibye Dr. Jose Chameleone na Ragga Dee, iki gitaramo kiraza gutaramamo abandi b'amazina akomeye mu ruganda rw'imyidagaduro muri Uganda barimo Maulana & Reign, Madrat & Chiko na Ssenga Nantume. Aba kandi biyongeye kuri King Saha, Spice Diana ndetse na Ava Peace.
