Ikipe ya Tigres FC ikina ikiciro cya kabiri muri Colombia yatangaje ko uwari perezida wayo Edgar Paez yarashwe ndetse akitaba Imana, nyuma y'uko iyi kipe yari imaze gutsindirwa mu rugo na Atletico FC ibitego 3-2.
Nk'uko bitangazwa n'ibinyamakuru byo muri Colombia Edgar Paez w'imyaka 63 yar mu modoka ndetse n'umukobwa we hafi ya stade ya Tigres FC yitwa Tigres' Metropolitano de Techo Stadium, araswa n'abagabo babiri bari kuri moto.
Aba bagabo baje bashaka Edgar Paez ndetse aba ari nawe barasa gusa dore ko umukobwa we bari kumwe nta gikomere na kimwe bamusigiye.
Iyi kipe yanditse ku rukuta rwayo rwa X yahoze ari twitter iti:"Umuryango wa Tigres ubabajwe cyane n'ibyabaye.
"Umurava we ku ikipe ndetse no kwitanga ngo hagerwe ku iterambere rya siporo mu gace kacu byasize ikimenyetso ku bagize amahirwe yo kumumenya."
Ishyirahamwe ry'umupira w'amaguru muri Colombia naryo ryihanganishije umuryango wa Paez ndetse n'ikipe ye.
Bagize bati:"Ishyirahamwe ry'umupira w'amaguru muri Colombia na komite nyobozi yaryo tubabajwe n'urupfu rwa Nyakubahwa Edgar Paez wari perezida w'ikipe ya Tigres FC. Turihanganisha ndetse turifatanya n'umuryango we, inshuti, mu gahinda ndetse tumwifurize iruhuko ridashira."
Paez yitabye Imana ku myaka 63
