Kuri icyi Cyumweru nibwo hateganyijwe umukino ikipe ya Chelsea igomba kwakiramo Liverpool ariko bamwe batangiye kugira impungenge ko uyu mukino wanasubikwa kubera ubwandu bwa Covid-19 bukomeje kugaragara muri Liverpool.
Umutoza wa Liverpool Jurgen Klopp yatangaje ko hari abandi bantu bacye bagaragaye ko banduye covid-19 muri Liverpool. Klopp kandi avuga ko atazi niba basaba ko uyu mukino wabo na Chelsea wasubikwa buretse ko atigeze anabihakana.
Jurgen Klopp kandi ntiyigeze avuga neza abakinnyi bashya baba banduye Covid-19 mu gihe bitegura uwo mukino uri ku Cyumweru.
Mu kiganiro n'itangazamakuru gitegura uwo mukino, Jurgen Klopp yagize icyo atangariza itangazamakuru ati:"Dufite abantu batatu bashya banduye Covid-19 mu ikipe ndetse n'abandi bake mu buyobozi(staff), ubwo rero si byiza muri iki gihe.
"Sindavuga amazina yabo kuko tugomba gukoresha ubwo buryo bwose haba gupima neza ndetse n'ibindi byose, ariko muzabibona ku munsi ukurikira ejo ku rupapuro rw'umukino.
"Bizaba bigaragara neza ngo ninde wanduye ninde utanduye."
Ndetse Jurgen Klopp yabajijwe niba Liverpool yasaba ko umukino wayo na Chelsea usubikwa, maze asubiza ati:"Ubu ntibiramenyekana, ariko ntawamenya.
"Ntago twari twarigeze kugira ubwandu bungana gutya aho abakinnyi 10, 15, 20 baba barwaye, kuri twe ni benshi buri munsi haboneka undi.
Mu gihe byaba byemejwe ko uyu mukino ugomba kuba nta gisibya, Liverpool iraza kuba yirinda gutsindwa imikino ibiri ikurikirana dore ko iherutse gutsindwa na Leicester City igitego 1-0.
Iyi kipe ya Liverpool igomba gushaka uko ibona amanota atatu kugira ngo ikomeze kwiruka inyuma ya Manchester City bigaragara ko iri kugenda ishyiramo intera.
Uyu niwo mukino wa nyuma Mohamed Salah, Sadio Mane na Naby Keita baraba bakinnye muri Liverpool mbere yo kwerekeza mu bihugu byabo bitegura irushanwa rya CAN rigiye gutangira muri Cameroon.
Jurgen Klopp aravuga ko muri Liverpool Covid-19 yabayogoje(Image:Team talk)
Umukino wa Chelsea na Liverpool ushobora gusubikwa(Net-photo)
