Thomas Tuchel utoza ikipe ya Chelsea aremeza ko amahirwe yo gutwara igikombe cya shampiyona yayoyotse, ndetse ngo intego ni gusoza mu makipe ane ya mbere mu Bwongereza.
Muri uyu mwaka w'imikino Chelsea yamaze amezi abiri iyoboye urutonde rwa shampiyona kuva mu kwezi kwa 10 kugeza mu kwa 12, ariko nyuma byaje kwanga kugeza aho irushwa amanota 16 n'ikipe ya mbere n'ubwo ifite umukino w'ikirarane.
Tuchel utoza iyi kipe aremeza ko ibyo gutwara igikombe cya shampiyona bitakiri ibyabo, ko ahubwo barajwe ishinga no gusoza mu makipe ane ya mbere mu Bwongereza.
Kuri uyu wa Gatanu Thomas Tuchel ubwo yiteguraga umukino na Crystal Palace, yagize ati:"Amanota 16 ni menshi cyane, ni menshi cyane. Ugereranyije n'aho dushaka kuba turi ndetse n'ibyo dusaba twe ubwacu. Ariko niko kuri.
"Kugira ngo tugere ku ntego zacu, kureba ibishoboka ni ingenzi cyane, ubwo rero ntidukwiye kwicanga dutekereza ku gutwara Premier league.
"Kugeza ubu tugomba kumenya ko turi mu nkundura yo kurwanira kuza mu makipe ane ya mbere, kandi ni ikintu kinini muri Premier league muri rusange."
Ikipe ya Chelsea yatangiye umwaka w'imikino irwanira igikombe cya shampiyona ariko aho bigeze bigaragara ko iri kugenda isigara cyane. Iyi kipe irushwa amanota 16 na Manchester City iri ku mwanya wa mbere, ndetse Chelsea irusha amanota atatu Manchester United iri ku mwanya wa kane.
Ariko nanone Chelsea iracyafite umukino w'ikirarane itarakina. Chelsea kandi ifite umukino kuri uyu wa Gatandatu aho yakirwa na Crystal Palace saa 17:00
Thomas Tuchel abona amahirwe yo gutwara igikombe yarayototse(Image:The Independent)
Chelsea irarwanira gusoza mu makipe ane ya mbere mu Bwongereza(Net-photo)
