Police FC yakubitiye Mukura Victory Sports ku mbehe yayo, Gasogi United iranyagira

Police FC yakubitiye Mukura Victory Sports ku mbehe yayo, Gasogi United iranyagira

 Jan 17, 2022 - 13:02

Mukura Victory Sports yatsinzwe na Police FC mu gihe Gicumbi FC yahuraga n'uruva gusenya.

Kuri uyu wa mbere nibwo mu Rwanda hari hateganyijwe imikino ibiri ya shampiyona y'u Rwanda aho ariyo yafungaga umunsi wa 12 w'iyi shampiyona.

Umukino wa mbere ari nawo wari ukomeye ni umukino wabereye mu karere ka Huye aho ikipe ya Mukura Victory Sports yari yakiriye ikipe ya Police FC.

Ni umukino watangiye ku isaha ya saa 15:00 kuri stade mpuzamahabga ya Huye, ndetse ukaba wari uyobowe na Ngaboyisonga Patrick nk'umusifuzi wa mbere, mu gihe yafashwaga na Mukayiranga Regine, Mutuyimana Dieudonne ndetse na Rulisa Patience.

Abakinnyi bari babanje mu kibuga ku ruhande rwa Mukura ni umuzamu Nicolas Sebwato, Kubwimana Cedrick, Mwiseneza Daniel, Kayumba Soter, Habamahoro Vincent, Murenzi Patrick, Muhoza Trezor, Mukoghotya Robert, Matore Jean Papi, Opoku William na Gibrin Aboubakar Akuki.

Naho ku ruhande rwa Police FC, umutoza Francis Nuttal nawe yari yahagaritsemo abakinnyi ku buryo bukurikira. Ndayishimiye Eric, Nshuti Savio, Rutanga Eric, Turatsinze John, Mussa Omar, Ngabonziza Pacifique, Nsabimana Eric, Twizeyimana M.Fabrice, Ntwali Evode, Usenimana Danny na Ndayishimiye Dominique.

Ni umukino amakipe yombi yatangiye ashaka ibitego ariko ntihaboneke uburyo bwinshi n'ubwo n'ubwabonetse butagize icyo butanga bigatuma igice cya mbere cyirangira ari ubusa ku busa.

Mu gice cya kabiri ni ikipe ya Mukura Victory Sports yagaragaje ubukana cyane mu minota 25' ya mbere aho yahushije ibitego mu buryo bwageragezwaga na Mukoghotya Robert, William Opoku ndetse na Akuki.

Gusa n'ubwo Mukura yayoboye umukino muri iyo minota, ku munota wa 69' Police FC yahise ibavumba igitego cyatsinzwe na Ndayishimiye Antoine Dominique ku mupira yahawe na Iyabivuze Osee.

Ikipe ya Mukura Victory Sports yagerageje gushaka igitego cyo kwishyura biranga. Ibi byafashije Police FC kwigira imbere ku rutonde rwa shampiyona aho yicaye ku mwanya wa gatatu n'amanota 22.

Undi mukino waberaga kuri stade ya Kigali i Nyamirambo, abasore ba KNC bo barimo bidagadura banyagira Gicumbi FC akavagari k'ibitego, dore ko Gasogi United yari imaze imikino igera kuri irindwi itazi intsinzi. Muri iyo mikino irindwi, Gasogi United yatsinzwemo imikino ine, inganya itatu.

Igitego cya mbere cya Gasogi United cyatsinzwe na Bakhit Djibrine ku munota wa 4', ku munota wa 29' Ndabarasa Trezor atsinda icya kabiri, ku munota wa 35' Bugingo Hakim atsinda icya gatatu, naho Malipangu yatsinze igitego cya kane ku munota wa 45'.

Ku munota wa mbere w'inyongera umukino ugana ku musozo nibwo Gicumbi FC yabonye igitego cy'impozamarira cyatsinzwe na Eric Tuyishime. Byatumye umukino urangira ari ibitego 4-1.

Abakinnyi Mukura Victory Sports yabanje mu kibuga

Abakinnyi Police FC yabanje mu kibuga

Gasogi United yatsinze Gicumbi FC

Gorilla na Etinecelles nizo za nyuma zifite amanota umunani