Ku kibuga cy'imyitozo cya Real Madrid kitwa Valdebebas ingamba zikomeje gukazwa dore ko ubwoba ari bwose ko ubwandu bwa Covid-19 bwakomeza kwiyongera muri iyi kipe.
Kuri uyu wa Gatatu nibwo hatangajwe abantu batandukanye banduye Covid-19 mu ikipe ya Real Madrid bituma bakaza ingamba zo kwirinda ubu bwandu bushya bwitwa Omicron.
Muri abo banduye harimo Luka Modric umunya-Croatia ukina hagati mu kibuga ndetse na Marcelo umunya-Brazil ukina nka myugariro ku ruhande rw'ibumoso.
Mu banduye kandi harimo umukinnyi ukinira Real Madrid ya Basketball witwa Thomas Heurtel ndetse n'umutoza wa Basketball witwa Pablo Laso batangajwe ku wa mbere.
Muri iyi kipe rero yo mu murwa mukuru wa Espagne, ubwoba ni bwose ko icyi cyorezo cya Covid-19 gishobora kwiyongera ariko bakajije ingamba zo kwirinda.
Ikipe ya Real Madrid yongeye gusubizaho ingamba zakurikizwaga ubwo icyi cyorezo cyageraga muri Espagne mu 2020 nko gukora ikiganiro n'itangazamakuru hifashishijwe ikoranabuhanga ku buryo bw'amashusho.
Ikipe ya Real Madrid yahise ipima abandi bakinnyi bose ngo harebwe ko hari abandi bakwiyongera kuri Marcelo na Luka Modric ndetse ibisubizo biratangazwa mu masaha ari imbere.
Luka Modric na Marcelo bazasiba umukino Real Madrid izakira Cadiz ku Cyumweru ndetse n'umukino Athletic Bilbao izakiramo Real Madrid ku wa Gatatu ikaba ari nayo mikino ya nyuma ya Real Madrid mu 2021.
Bombi bashobora kugaruka mu mwaka wa 2022 ku mukino Real Madrid izaba yasuye Getafe nibaramuka bameze neza bakize Covid-19.
Muri Espagne bateganya ko umuntu wanduye Covid-19 ashobora kumara byibuze iminsi 10 mu kato yitabwaho ubundi agakira.
Luka Modric na Marcelo barwaye Covid-19(Image:Blaze Trends)
