Umuhanzi wo muri Nigeria wegukanye Grammy Awards Ayodeji Balogun amazina nyakuri ya Wizkid, yasubije abafana be bari bamaze iminsi bamushyira ku gitutu cyo gusohora indirimbo. Uyu muhanzi, akaba yatangarije abakunzi be ko azongera gukora umuziki mu myaka ine cyangwa itanu iri imbere.
Mu butumwa umuririmbyi wa 'Essence' yacishije ku rukuta rwe rwa Instagram, akaba yavuze ko muri iyi minsi ari mu kiruhuko, aho yavuze ko ari gukina umupira w'amaguru ndetse na gorofe mu buryo bwo kwishimira ikiruhuko cye. Akaba avuga ko icyo kiruhuko kidashobora kurangira munsi y'imyaka ine.
Wizkid yatangaje ko ari mu kiruhuko akina ruhagao aho yemeza ko azagaruka nyuma y'imyaka 4
Wizkid guhera yapfusha nyina ku wa 18 Kanama 2023, akaba adakunze kugaragara ku mbuga nkoranyambaga, dore ko akunze kuboneka inshuro nkeya cyane.Nubwo abafana ba Wizkid barimo bamwishyuza indirimbo, akaba yaherukaga gusohora iyo yise "Money & Love,” ku wa 04 Ugushyingo 2022, aho iri no kuri alubumu yise “More Love, Less Ego.”
Icyakora nubwo Wizkid yatangaje ko azongera gukora umuziki mu myaka ine cyangwa itanu iri imbere, ntabwo byaba ari ubwa mbere abitangaje, kuko no mu 2019 nabwo yigeze gutangaza ko agiye gufata akaruhuko mu muziki, ariko yahise agaruka bidatinze. Kuri iyi nshuro nabwo byitezwe ko ataraza kumara iyo myaka yose, ahubwo ashobora kugaruka mbere yayo.
Wizkid aremeza ko azagaruka nyuma y'imyaka ine mu muziki
