Mu itangazo CNN ifitiye kopi, ubuyobozi bwa Miss Universe Organization (MUO) itegura iri rushanwa bwavuze ko bushinishijwe no kwemeza ko Ayoub azahatana mu irushanwa rya Miss Universe ya 2025 rizaba mu Ugushyingo uyu mwaka.
Buti: “Miss Universe Organization ishimishijwe no guha ikaze abahagarariye ibihugu byabo ku mubumbe..... Ms. Ayoub, umunyamideri ukomoka muri Palestine, yujuje ibikenewe mu irushanwa ryacu."
Ayoub asanze abo bahanganye basaga 130 baturuka mu bihugu bitandukanye bari guhatanira iri kamba rya Miss Universe rizatangwa ku nshuro ya 74 ritangirwe i Bangkok, muri Thailand, ku wa 21 Ugushyingo.
Ayoub w'imyaka 27 y'amavuko, yambitswe ikamba rya Miss Palestine muri 2022, yatangarije kuri Instagram, ku wa 4 ushize, ko ashimishijwe no kuba ijwi rivugira Abanya-Palestine bagenzi be, by'umwihariko abana n'abagore, binyuze muri uku kubahagararira.
Mu butumwa yanyujije ku rukuta rwe rwa Instagram, uyu mukobwa yagaragaje ko ashimishijwe no kuba ijwi rivugira Abanya-Palestine bagenzi be by'umwihariko abana n'abagore.
Uyu mwanzuro wo kwemerera Abanya-Palestine guhatanira amakamba akomeye mpuzamahanga y'ubwiza uje nyuma y'intambara Israel na Palestine uri kubera muri Gaza ikaba imaze guhitana abasaga ibihumbi 60, biganjemo abana n'abagore, kuva yatangira muri 2023 nk'uko Ministeri y'Ubuzima ya Palestine yabitangaje kuri uyu wa mbere.
Uko iyi ntambara ikomeza gukaza umurego, umubare w'ibihugu bifata Palestine nka Leta yigenga uri kwiyongera ku bindi bihugu bisaga 145 byari bisanzwe byemera Palestine nka Leta yigenga mu muryango mpuzamahanga.
Ibihugu bikomeye nka Australia, Canada n'u Bufaransa biherutse gutangariza imigambi yo kwemera Palestinian nka Leta yigenga mu Nama Rusange y'Umuryango w'Abibumbye yabaye muri Nzeri y'umwaka ushize wa 2024. Ubwami bw'u Bwongereza bwo bwavuze ko buzafata Palestine nka Leta yigenga ari uko yujuje ibisabwa birimo kwemera igihe cyo gutanga agahenge muri iyo ntambara iri kubera muri Gaza.
