Mu mpera z'icyumweru gishize nibwo FC Barcelona yagiye gutsindira Real Madrid iwayo ibifashijwemo n'abakinnyi bayo nka Aubameyang, Ferran Torres, Ronald Araujo na Ousmane Dembele wari umeze neza.
Mu gihe iyi kipe ubu yicaye ku mwanya wa gatatu aho irushwa na Real Madrid amanota 12, kapiteni wayo Sergio Busquets avuga ko nabo bagihataniye igikombe cya shampiyona mu gihe abenshi babona ko byarangiye.
Aganira na Barça TV nyuma yo gutsinda Real Madrid, Busquets yagize ati:"Uyu munsi ndatekereza ko ibintu byari mu buryo bwacu, ndatekereza ko twagakwiye kuba twatsinze ibitego byinshi uyu munsi. Reba, twari tubizi ko iyo dukora ibintu neza twari gutsinda. Biriya nibyo twarimo dukora n'uyu mutoza.
"Twari kuba twatsinze ibitego byinshi uyu munsi. Nitugira amahirwe tubona muri shampiyona tuzabikora, birakomeye ariko tugomba guhora twiteguye ku manota asigaye. Icya mbere ugomba kwishyira ku mwanya wa kabiri, kuko Sevilla irahari."
Kugeza kuri ubu ikipe ya FC Barcelona ni iya gatatu muri La liga aho irushwa amanota 12 na Real Madrid iri ku mwanya wa mbere, n'ubwo Barça ifite ikirarane aho izakina n'ikipe ya Rayo Valecano.
Abakunzi ba Real Madrid ndetse n'abandi bakurikira shampiyona ya La liga babona ko bisa nk'aho Real Madrid yamaze gutwara iki gikombe, kuko babona ko bigoye ko yatakaza ayo manota mu mikino ikenda isigaye ngo umwaka w'imikino urangire.
Nyuma yo gutsinda Real Madrid, Busquets avuga ko bagihataniye shampiyona(Image:Net-photo)
