Nyuma y'imikino ibiri y'umunsi wa 20 wa Primus National League yabaye ku wa Kane no ku wa Gatanu, kuri uyu wa Gatandatu hakinwe imikino ine.
Umukino wabaye hakiri kare kuri uyu munsi ikipe ya Gorilla FC yatsinze Eapoir FC ibitego 2-0, hakurikiraho Mukura Victory Sports yatsindiwe iwayo na Rwamagana City 1-0.
Imikino ibiri yari isigaye ikomeye harimo uwo Kiyovu Sports yakiriye Marine FC. Kiyovu Sports yatangiye itsindwa igitego ku munota wa 11 igice cya mbere kirangira uko, ariko mu gice cya kabiri ibasha kubona ibitego bitatu.
Ni ibitego byatsinzwe na Riyaad Nordien ku munota wa 49, Mugenzi Bienvenue atsinda icya kabiri ku munota wa 71, mu gihe Mugenzi Bienvenue yongeye gutsinda icya Gatatu ku munota wa 84 Kiyovu ikabona amanota atatu gutyo.
Kiyovu yakuye amanota atatu kuri Marine FC
Undi mukino w'agapingane wahuje ikipe ya Gasogi United na Rayon Sports nawo ni umukino utari woroshye. Ku munota wa 17 gusa, Gasogi United yari imaze gufungura amazamu ku gitego cyatsinzwe na Bugingo Hakim.
Essomba Leandre Willy Onana niwe waje kuba umucunguzi wa Rayon Sports kuri uyu munsi kuko uyu mugabo yishyuye igitego ku munota wa 45, ndetse yongera gutsinda icya kabiri ku munota wa 84.
Ibi byatumye Rayon Sports iba ifashe umwanya wa mbere aho ifite amanota 39, ikaba irusha APR FC amanota abiri itarakina umukino wayo w'umunsi wa 20. Kuri iki Cyumweru, Police FC izakira Musanze FC, naho APR FC yakire Etincelles.
Onana yafashije Rayon Sports kubona amanota atatu
Uko urutonde rwa shampiyona ruhagaze
