Mu ijoro ryo kuri uyu wa kabiri nibwo hari hagarutse imikino ya UEFA Champions league abenshi bita irushanwa ry'abagabo.
Ni imikino ibiri ya kimwe cya kane, aho biteganyijwe ko indi mikino ibiri ibanza iraba kuri uyu wa Gatatu. Umukino wa mbere utari woroshye wabereye ku kibuga Etihad Stadium mu Bwongereza mu mujyi wa Manchester.
Ikipe ya Manchester City y'umutoza Pep Guardiola yari yakiriye Atletico Madrid y'umutoza Diego Simeone, ndetse wari umukino wagoranye cyane bitewe n'imikinire ya Atletico Madrid aho icya mbere ari kurinda izamu.
Nyuma y'uko Manchester City ikinnye igice cya mbere cyose ishaka igitego ariko kikabura, mu gice cya kabiri Pep Guardiola yakoze impinduka zatanze umusaruro mu gice cya kabiri.
Ku munota wa 70, nibwo Phil Foden wari winjiye mu kibuga asimbuye Riyad Mahrez, yahaye umupira Kevin De Bruyne ahita afungura amazamu.
Kevin De Bruyne yatsindiye Manchester City igitego(Net-photo)
N'ubwo ikipe ya Manchester City yakomeje kwataka ishaka igitego cya kabiri, ntibyabakundiye kuko umukino warangiye bagifite kimwe gusa.
Ku rundi ruhande, ikipe ya Liverpool y'umutoza Jurgen Klopp yari yerekeje muri Portugal gusura Benfica y'umutoza Verissimo ku kibuga Estádio de Luz.
Liverpool yinjiye mu mukino kare kuko ku munota wa 17 Ibrahima Konate yatsinze igitego cya mbere ku mupira yahawe na Andrew Robertson, ndetse ku munota wa 34 Luiz Diaz nawe yahaye Sadio Mane umupira agatsinda igitego cya kabiri.
Bavuye kuruhuka, Rutahizamu wa Benfica umeze neza cyane muri iyi minsi umunya-Uruguay Darwin Nunez yayitsindiye igitego kimwe, ariko mu minota ya nyuma Luiz Diaz atsinda igitego cya gatatu cya Liverpool.
Liverpool yatsindiye Benfica iwayo(Net-photo)
Aya makipe yakinnye uyu munsi azakina imikino yo kwishyura tariki 13 Mata 2022. Kuri uyu wa Gatatu saa 21:00, Chelsea irakira Real Madrid naho Villarreal yakire Bayern Munich. Aya makipe yo azakina imikino yo kwiahyura tariki 12 Mata 2022.
