Lionel Messi yujuje ibitego 100 mu ikipe y'igihugu ya Argentine mu mukino Argentine yatsinzemo igihugu cya Curacao ibitego 7-0, ubwo yatsindagamo ibitego bitatu.
Uyu mugabo w'imyaka 35 yafunguye amazamu ku munota wa 20 ku gitego yatsinze n'ikirenge k'iburyo ahita yuzuza ibitego 100, kuko yinjiye muri uyu mukino afite ibitego 99 yatsindiye Argentine.
Muri uyu mukino kandi Lionel Messi yongeyeho igitego cya 101 n'icya 102, ibitego bitatu yatsinze mu minota 37 y'igice cya mbere ari nako Argentine yasoje igice cya mbere ari ibitego 5-0 nyuma y'uko Enzo Fernandez na Gonzalez nabo batsinze.
Lionel Messi yujuje ibitego 100 muri Argentine
Angel Di Maria na Gonzalo Montiel batsinze ibindi bitego bibiri mu gice cya kabiri, bituma umukino urangira Argentine itsinda Curacao ibitego 7-0.
Kugeza ubu ni abakinnyi babiri gusa batsinze ibitego byinshi mu ikipe z'ibihugu. Uwa mbere ni Cristiano Ronaldo watsindiye Portugal ibitego 122, uwa kabiri ni umunya-Iran Ali Daei watsinze ibitego 109, Messi akaba uwa gatatu n'ibitego 102.
Lionel Messi kandi niwe mukinnyi wa mbere w'umugabo muri America y'epfo utsindiye ikipe y'igihugu ibitego 100, n'ubwo uyu mugabane wagize ibihangange muri ruhago nka Pele, Maradona, Ronaldo Luis Nazario, Romario n'abandi.
Uyu munya-Argentine kandi andi mateka yanditswe ko ariwe mukinnyi rukumbi watwaye Igikombe cy'isi akanatsindira ikipe y'igihugu ibitego 100.
Nyuma y'imikino y'amakipe y'ibihugu, Messi agiye gusubira muri Paris Saint-Germain aho bitarasobanuka niba azongera amasezerano. Muri Kamena 2023 azaba asoje amasezerano ye, ndetse amakuru avugwa amwerekeza mu makipe atandukanye arimo na Barcelona yahozemo.
Argentine ikomeje ibihe biryohereye
Messi akomeje gushyiraho uduhigo
